67ngut ki briew, ki la mynsaw, haba ka rynsan jingialang paidbah jong U Narendra Modi, myntri rangbah duh ka Ri, ka la khyllem mynta ka sngi ha madan jong ka kolej Midnapore, kaba don ha West Medinipur jong ka West Bengal. Na kitei la iathuh ba 3ngut ki mynsaw jur bad kiba bun na kitei kiba mynsaw, ki dei ki kynthei.
“Ka dei ka jingjia kaba shu jia kyndit bad katba ka jingtei ka dang khyllem, nga la shah bom ha u nar rod bad nga hap ha ka ktieh bad ki don kiba mareh bad kiba iuh ianga” ong ka Swarno Mahato, kaba 55 snem ka rta, kaba na ka shnong Goaltore jong ka West Midnapore district. Ka Swarno, ka wan da ka bos na Midnapore ha ryngkat bad ka pyrsa kurim jongka, ka Sumitra, ban sngap khnang ia ka jingkren u myntri rangbahduh.
U Tanmay Kumar Panja, Medical Superintendent u iathuh ba ki don 90ngut ki briew, kiba la leit shah sumar ha Hospital bad 14ngut la pyllait noh ia ki bad 76ngut ki dang don ha ka jingshah sumar, ha kaba 56ngut ki dei ki shynrang bad 20ngut ki kynthei.
Katei ka jingkhyllem katei ka rynsan, ka dei ha ka por ba U Narendra Modi, myntri rangbah duh, u dang kren paidbah ha katei ka jingialang. U Modi, kham hadien, ula leit jngoh ia kitei kiba pang ha katei ka Hospital.