Khwai u rangbah da u kha phylla na Umiam, buit ki kti haba ktah

Shillong, 25 Nailur:
Uwei u rangbah uba la tip kyrteng kum u bah Mathius Lyngdoh lyngkhoi uba dei na ka shnong umniuh-umiamkhwan, kaba don ha Umiam u la ioh ban khwai da ka jar ia uwei u dohkha u bym lah ban tip kyrteng bad uba phylla ha ka dur ka dar bad ka rong ka rup.
Haba u nongaikhubor u la ioh jingtip halor utei u dohkha uba phylla, mar mar u leit sha katei ka shnong kaba don hajan Umbir, syndah bad ka wah Umiam ha kaba la lap ia ki marjan marpa kiba la ialum lang na ka bynta ban peit ia une u dohkha uba phylla.
La buh ia une u dohkha ha ka borti plastik heh kaba 20 litar bad ia ka um na ka bynta une u dohkha la tong hi na ka wah Umiam bad ym shym la buh satia da ka umkor kaba dei ka umbam umdih namar la batai ba dei ban buh da ka um kaba u ju im une u dohkha kata na ka wah Umiam. Mar iapoi u nongthoh khubor ha kane ka jaka, uwei u rangbah uba don ha iing u la sei ia une u dohkha na ka borti bad la iohi shisha ia ka jingphylla ha ka dur ka dar bad kumjuh ruh ha ka rong kaba une u dohkha u don. La iathuh ba ia une u dohkha la ioh ban khwai da ka jar hynnin mynstep ha ka por 7 baje bad na ka liang jong u bah Mathius u la i phylla ia une u dohkha bad u la rah mar mar sha iing ban pyni ha kiba haiing hasem bad kumjuh ruh ha ki marjan marpa.
Haba u nongaikhubor u la iohi dalade ia une u dohkha la iohi ba ka shyntur jong une u dohkha ka don ha ki bynta ba shapoh jong ka khlieh kaba dei ha ki bynta jong ka kpoh bad ka jingkhia jong une u dohkha ka long kumba shiteng kilo.
Une u dohkha u don ruh ia ka met kaba long kum ki shyiah namar mar ia twad ki long kumba thar ia ki kti bad kane ka long baroh kawei ka met bad kaba phylla ka long ba kito kiba ktah kham slem ia une u dohkha ki iathuh ba, ka don ka jingdait buit jong ki kti Ki paidbah kiba shong ha kane ka jaka bad kiba ju smat ban khwai dohkha ki la iathuh ba kane kadei ka sien kaba nyngkong ban ioh ia kum une u dohkha bad kim tip ruh ia ka kyrteng jong une u dohkha bad ki la ong ruh ba une u dohkha u iasyriem bad u tyrpud.
Halor kane ki la pyntip sha ki bor ba dei peit jong ka tnad fishery ha Ri Bhoi District bad la sngewthuh ba shen kin sa wan bn peit bniah ia une u dohkha uba phylla bad la pynpaw ruh da ki riew paidbah ba ia kum une u dohkha ruh ym pat ju iohi wat ha discovery channel.
Kawei pat ka jingphylla jong une u dohkha ka long ba haba buh ha madan bad phah dem um dem pura satia ha madan da ka kpoh, hynrei ki sner jong une u dohkha ki ieng triang bad neh thik hajuh bad haba peit lei ha madan i kum ka eroplain ka kaba dang ieng ha kad liengsuin.