Khusnam Phadar Sngi, pynkup burom ka KSU ia 75 ngut ki samla

Nongpoh:Ki la don kumba 75 ngut ki samla pule na Ri Bhoi bad kiba la wan shakhmat ha ki kyrdan pule bapher bapher, mynta ka sngi ki la shah pynkup burom ha ka Khasi Student Union, North Khasi Hills District Unit bad kitei kiba la shah pynkup burom ki la iohpdiang ia kata ka khusnam kaba la tip Fr. Sylvanus Sngi Lyngdoh Maitshaphrang Academic Excellence Award 2023.

Lyngba jong katei ka sngi, ba ka KSU ka la pynlong ia katei ka prokram pynkup burom ha District Library Nongpoh, ha kaba la sakhi da ka jingdon Bah Shemphanglang L. Mawphlang, Vice-President barim ka KSU Sengkmie, nangta u samla Pynshaiborlang Rani, u Bah Ferdynanld Kharkamni, President KSU, NKHD, Samla James Mawphniang, Secretary KSU NKHD lem bad shibun ki riew rangbah bad ki nonghikai.

Lah ruh ban kdew hangne, ba kane ka khusnam ba ka KSU ka pynkup burom sha ki samla pule ha Ri Bhoi, ka la dei ha ka sien ba-ar, ha kaba ka KSU ka la pynkup burom ia baroh kito ki samla kiba la wan shakhmat ha ki jingpule bapher bapher, ki kynthup naduh ha ka kyrdan SSLC, HSSLC, Degree bad shaduh ka kyrdan Phd.