Shillong: Ka Shillong Lajong myn hynnin ka sngi ka la ioh ban khur ia ka jingjop na baroh ar ki kynhun ialehkai jong ka ha ki kyrdan bapher kawei na ka kynhun jong ki U-18 bad kawei pat na ka kynhun jong ki U-14.
Ha kaba iadei bad ka jingialehkai jong ki U-18 kaba la long pyrshah ia ka SAI Guwahati ha MFA Ground ka Lajong ka la lah ban pynliem ia ka SAI Guwahati da 1-0 kol.
Ia katei ka kol pynjop naka bynta ka Lajong la ioh ban thep da u Freestar Kharbangar ha ka minit kaba 18.
Ha kane ka jingjop jong ka pyrsha ia ka SAI Guwahati mynta ka Lajong ka la poi sha ka final jong ka U-18 Youth League. Ka Lajong ka iaineh ha khlieh duh jong ka miej iakhein point ha kaba ka la ioh ban kamai haduh 13point na ki 5tylli ki jingiakhun.
Ka jingiakhun ba khatduh jong ka Lajong kan long pyrshah ia ka North East United ha ka 7tarik u Rymphang ha Shillong.
Ha kawei pat ka jingialehkai kaba dei na ka kynhun jong ki U-14 ka Shillong Lajong ka la lah ban pynliem ia ka Lumshyiap da 4-1kol ha ka jingiakhun kaba la long mynta ka sngi ha SSA Stadium ha Polo.
Ha kane ka jingiakhun ka Lajong ka la ioh ban pynkhin jar tang hapoh ka 3minit ha kaba la ioh ban thep ia ka kol ba nyngkong jong ka Lajong da u Colinsal Mon Lyng-doh ha ka minit kaba 3.
Katba ia ka kol kaba ar bad ba lai la ioh ban thep da u Batskhemlang Jyrwa ha ka minit kaba 24 bad 49 bad ia ka kol kaba saw la ioh ban thep da u Wadajied Ryngkhlem ha ka minit kaba ki ai tam (90+).
Kane ka jinglah jong ka ban pynliem ia ka Lumshyiap, mynta ka Lajong ka la poi sha ka Semifinal jong ka U-14 SSA Football Tournament. Ka Lajong ka don mynta ha khlieh duh na ka Groupd D ha ka miej iakhein point da kaba ioh ban kamai 12point na ki 4tylli ki jingialehkai.