Nongpoh: Ha kaba sdang ka sdang ka 2nd Hiarless Timung Football Tournament 2019, ka Lumkya Sports Club ka la ioh ban khur ia ka namjop kaba nyngkong, hadien ba ka la lah ban pynliem kput haduh 5-0, pyrshah ia ka Umkaduh Sports Club ha ka jingiakhun kaba la long hynne ka sngi ha madan ialehkai ka shnong Umsawnongbri.
Ia kate ka lympung ialehkai phutbol, la wan ban plie paidbah da u Bah RB Shadap, President ka RBDSA, ha ryngkat ka jingdonlang kiwei ki riew rangbah, kaba kynthup ia u Samla Mission Tron, u Bah S.I Pamshong President ka Umsaw Nongbri Sports Club, Bah Pull Nongrum bad kiwei de ki riew rangbah.
Haba phai sha kane ka jingiakhun, da shisha ka la long ka jingiakhun kaba noh shilliang, namar ki rangialehkai ka Lumkya SC ki la lah ban ialehkai kham bha bad lah ruh ban tehlakam ia ka jingiakhun bad kaba la pynlong ruh ia ki ba tang ha ka kylla step ba kin thep haduh 2-0.
Haba bteng ka kylla miet, ki rangiahkai ka Lumkya SC ki la nangnion tyngeh pyrshah ia kitei ki rangialehkai ka Umkaduh SC bad ha kaba kum katei ka jingkhun, ka la pynlong ruh ia ki rangialehkai ka Lumkya SC ba kin thep biang sa 3 kol bad kaba la pynlong syndon ia ka kynhun ba kan pynliem noh da 5-0 ia ka Umkaduh SC bad khur syndon ia ka namjop ha kaba sdang jong katei ka lympung ialehkai.
Haba ai jingkren ha kane ka sngi, u Bah RB Shadap, u la pynpaw ka jingsngewkmen bad ai ka jingiaroh ia u Samla Mission Tron, u ba la shim ia katei ka sienjam ban kynmaw burom ia u jong u kpa (Bam kwai ha dwar u Blei), uba dei ruh uwei na ki riew rangbah ba paw ha ki por ba mynshwa ha katei ka thain.
U Bah RB Shadap, u la ong ruh, ba ka jinglah ban pynlong ia kaba kum kitei ki lympung ialehkai, ka ka long ruh kum shibynta ban kyntiew ia ki khun samla, kiba don ia ka sap kaba kyrpang ha ka kam ialehkai phutbol, namar lyngba jong kiba kum kitei ki lympung, kaba ki samla ki lah ban pynpaw pyrthei ia ka sap kaba ki don.
Phi don ban ong eiei?