Nongstoiñ: Ka kynhun ialehkai jong ka Gorkha Training Centre (GTC) kala ioh ban khur ia ka jingjop ha ka jingiakhun kaba nyngkong eh jong ka lympung kynjatbol kaba la tip kum ka 1st Knock out football Tournament 2018 ia kaba la bei tyngka da ka Amrit Cement bad bala pyniaid ruh da ka Kynshi Bangla Social & Cultural Sport Club.
Ka jinglah jong ka GTC ban khur ia katei ka jingjop kala wan hadien ba kala lah ban pynliem noh ia ka kynhun ialehkai jong ka Rangdajied United FC da 2 kol la 1 kol ha ka jingiakhun kaba la long hynnin ka sngi ha ka madan ialehkai jong ka shnong Kynshi Bangla.
U-Suresh-Gurung-jong-ka-GTC-u-bala-ioh-ban-pdiang-ia-ka-khusnam-MOM-na-u-BDO-ka-Mawthadraishan.
Haba phai sha ka jingiakhun kaba la long hapdeng kitei ki ar tylli ki kynhun kala long shisha ka jingiakhun kaba itynnad haduh katta katta namar ka jingiabiang bor bha da baroh ar liang mamla bad kumjuh ruh namar ka jingtbit jong ki rangialehkai na baroh ar tylli ki kynhun kaba la pynhun hi jrut ia baroh ki paid riew ieid phutbol kiba la wan ban sakhi ia katei ka jingialehkai.
Ka jingiakhun haba ka sdang jong ka kylla step na ka liang jong ka GTC kala ioh ban lam khmat da 1 kol ha kaba la ioh ban thep ia katei ka kol da u Suresh Gurung ha ka minit kaba 17 bad na ka liang jong ka Rangdajied ruh kala ialehkai tyngeh ban ioh pynphai ia katei ka 1 kol hynrei kam shymla lah satia tad haduh ban da kut noh ka jingiakhun ha katei ka kylla step
Shuh shuh haba wan phai biang ha ka jingiakhun jong ka kylla miet na ka liang jong ka Rangdajied kala sdang ban ialehkai bha bad dei ha ka minit kaba 66 ka Rangdajied kala ioh ruh ia kawei ka kabu ksiar ban pynphai ia katei ka 1 kol bad khlem da pynsep ei na ka liang jong u Stephan Lyngdoh u la khyrwit ia katei ka kol kaba la pyniakhaid ruh ia ka jingialehkai.
Hadien katei ka jingiakhaid da mar 1 kol ka jingialehkai kala sdang ban pynitynnad bha ia ki nongwan peitkai bad ha ka minit kaba 80 na ka liang jong ka GTC kala ioh ban khyrwit sa ia kawei pat ka kol lyngba u Thering Bhutia kaba la pynskhem ia ka GTC ban jan sha ka jingjop bad watla ka Rangdajied kala shah tam biang da 1 kol kam shymla rit mynsiem hynrei kala ialeh tyngeh ban ikahun hynrei tad haduh ban da kut noh ka jingialehkai kam shynmla lah shuh ban pyniakhaid bad kala hap ban mad syndon ia ka jingshah jop.
Ia ka nam Man of the Match ha katei ka sngi la ioh ban khur da u Suresh Gurung jong ka GTC u ba la long ruh u wei na ki rang ialehkai u bala lah ban ialehkai khmabha ha katei ka sngi bad ia katei ka khusnam la ioh ban sam da u bah Aiban Syiemlieh sordar ka shnong Kynshi Bangla.