“Khublei Kopati Puja wa Suk”

Mr. Hamjhan H. Dkhar, Raliang

Ei Khublei Kopati Puja wa suk ia phi,
Ia waroh chynrang, kynthai i wi pa i wi;
Khublei kti wa phi na ai myn ioh
Kopati Puja ia phi u kyrkhu kyrdoh.

I’u man i khih u man i khan,
U ioh dei chait u ioh dei tram,
U Kharan u Skei u Kharan wyrnai,
I’u dap u snem u dap mania.

Khamtam u dap jabeiñ u dap jali;
Kiwa lai skur, wa purae puthi;
I’u man Sahep u man saba ha phi;
I’u ku ka Niam ka rukom ka Dustur Riti.

La dei khih mylla i kreh sorkar,
I’u lait u swei u lait u tlar.
I’u ka-it i lai ka-it i wan
I’u chkeh i doh I’u chkeh i pran.

U chraiñ ka khmat kam chraiñ Hati u Khla
U im suk im saiñ im mit im bha
I’u bang ki lok I’u bang ki jor,
Sei em muhot em salon akor.

Ngait snieñ ia ki waheh wa sien,
I’u suk ka mynried iong phi hadien.
Khamtam ka Niam ka Dustur Riti.
Haphi khmat salan to ia im sngi.

Ka pateiñ ki Ma ki woh iong ki da lai;
Ka pateiñ wa nangwan to pynheh pynkrai;
Myn em tam wa ioh heini ha pyrthai
La kat wa bun i ngait, du i wi pyrtuid Blai.

I don hi mynhoi mylliñ ïei trei,
Kopati Puja u makhanei
U pynneh pynsah ïei wad a em
U lour pynchuiñ ioh ko rahem.

Waroh ki lok kyrpad ia phi;
Ham sngawpher wa ei khublei deini
Kopati Puja wa suk, Kopati Puja wa kmen
Ha madan Sein Raij waroh u ia chem..

Heini ia chad ia kmen Kopati Puja,
Dei put dei tem u ia chad sngawbha
Waroh chynrang kynthai da ia kmen lang
Lait tang ha khlow Puja du ki chynrang.