Khublei ka UDP ia ka KSU

Shillong,3 Iaiong:
Ka UDP Youth Wing, lyngba ka kyrwoh ba la phah da u Vice President jong ka u bah Hamlet Dohling ka la phah ka jingkhublei ba kyrpang ia ki nongialam ka KSU bad ki dkhot jong ka ha kane ka sngi ba dei ka sngi kyrsiew thiah ia ka jaitbynriew, ka “Khasi National Awakening Day Movement”, kaba dei ruh ka sngi kyrpang kaba pynsah jingkynmaw ia ki riew ialeh kiba ia khih na ka bynta ban iada,pynneh pynsah bad kyntiew ia la ka jaidbynriew. Ka UDP ka la phah ruh ka ingai khublei ba kyrpang ia baroh ki paidbah ka bri u Hynniewtrep kumjuh ruh sha kiba don jngai na la ka ri.
“Ha kaba kum kane ka sngi kum ka jaidbynriew kaba mad shibun ki jingeh, ki jingialeh bad ki jingtynjuh kiba har rukom kiba thew kumno ban pynjot pynpra ia ngi kum ka jaidbynriew ngi sngew ban khot ban iawer lang ia baroh ba ngi donkam ia ka jingiatylli lang kawei kum ka jaitbynriew khnang ba ngin lah ban ialeh da kawei ka kti ia ki jingeh baroh” ong ka kyrwoh na u bah Hamlet Dohling.
Utei u nongialam barim ka KSU u la pynkynmaw ruh ba ka 4 tarik u iaiong ka dei ka sngi ban pynkynmaw pat ia ngi ki longdien bad kiba mynta ia ka mynsiem ieid ri bad ba shlur U Tirot Sing Syiem ban ieng ialeh pyrshah ia ki dohlieh ha kato ka por ba ka sorkar nongwei ka synshar donbor ha kane ka ri. ‘Ai ba kane ka sngi kyrsiew thiah ia ka jaidbynriew kan nangiai pynskhem ia ka nongrim bad mynsiem ieid ri bad len lade jong phi ki samla nongialam ka KSU bad baroh ki samla ka ri’ pynkut ka kyrwoh na u Vice President ka UDP Youth Wing.