“Khrong tang ka pisa, sma iewtung ka iew Umsning”

Shillong, 28 Nailur:
Ka Iew Umsning, ka dei ka iew kaba heh tam ha Ri Bhoi, hynrei ka dei pat kaba jaboh tam bad kaba dap da ki jingsma iewtung, ong ka kyrwoh na ka seng RBYWO, Umsning Circle bad katei ka seng, haba peit, la I dei ban khang noh ia katei ka iew kaba jaboh. “Ngi dap da ka jingsngewtieng namar ka jingnang U Syiem ban khrong tang ia ka pisa bad ia ki niut bad jaboh ki iehnoh da ki taiew bad sar ia ka shisngi shwa ka iew” ong ka kyrwoh na katei ka Seng.
Katei ka seng, ka ong ba kane ka iew ka dei kaba don hapdeng shnong bad long kum u dohnud, kaba la ker sawdong da hynriew tylli ki shnong hapoh ka Umsning town. Ha syndah eh jongka la ker da 3 tylli ki skul ka Nehru H.S.S, Govt LP bad Umsning Town secondary school bad ka shnong Umsning A bad B bad ka don ruh jan bad ka Umsning CHC.
Kumta ka seng ka kyntu ia U Syiem haba aiwai iaka iew hano hano, dei ban kdew ruh da ka hukum ba eh ba dei ban pynkhuid ia ka mar iadep ka iew bad lada ym lah ban leh ne trei, dei ban weng syndon ia ka kontrak na u nongshim wai ba mynta, namar kam shong hok ia u ban shu kamai bym hok ia kaba um shem la trei bad ka long pynban ka jingpynsajia ia ki paidbah bad ki khynnah skul ban im hapdeng ka jingjaboh bad jingsma iwtung kaba shyrkhei kaba mih napoh kane ka iew, pynkut ka kyrwoh na u bah Brightstar Pamsat President RBYWO Umsning Circle.