Shillong,25 Iaiong:
Hadien ba ka la shah beh seng na ka HSPDP, la ioh jingtip ba ki don bun ki Seng Sain pyrthei kiba la kwah ban tan ia ka Dr.Fenela L Nonglait sha ka seng jong ki, haduh mynta ym pat ioh jingshai haduh katno tylli ki seng bad kino kiba la leit ban ia kren bad ka kong Fenela, ban khroh ba kan wan iasoh noh bad ki. Haduh mynta ym pat ioh jingshai la na ka liang ka kong Fenela ne na ka liang kino kino ki Party shaphang katei ka jingiakren ban ia soh noh bad kawei ka seng, namarba kim pat kwah ban pynpaw pyrthei.
Ki lad khubor kiba la ioh lum la iathuh ba hadien ba la ioh sngew ia ka khuborba ka HSPDP West Khasi Hills ka la beh seng ia ka kong Fenela shuwa ba ka CEC kan shsim ia katei ka rai , la iathuh ba ka UDP ka dei kawei na ki seng sain pyrthei kaba kwah ban khring ia ka kong Fenela sha ka seng, la iathuh ruh ba na ka liang ka seng Congress ruh ka don katei ka jingthmu ban khroh ia ka kong
Fenela hynrei la ioh jingtip ba ki dang ar tatien ioh ba lehse ka kong Fenela ka la don lypa ka jingiateh bad ka UDP, hadien ba la sa phriang ki khubor beh seng, bad khamtam ba ka la leit ban kyrshan ia ka UDP ha kane ka elekshon MP Lok Sabha elekshon ba dang shu dep.
La ioh jingtip ruh ba kham mynshuwa, shuwa ba ka kong Fenela kan leit ban pyniasoh ialade sha ka kam sain pyrthei bad kumjuh ruh sa ka HSPDP ka la dodn ka jingtyrwa na ka seng Congress , kaba la tyrwa ruh da ki kam kiba heh lada ka wan ban don hapoh ka seng. La ong ba ka Congress ka la tyrwa ia ka kong Fenela ban bat ia ka kam heh hapoh ka Youth Congress ryngkat ki kam ba kan long ka Chairperson jong kano kano ka National Ccommission, hynrei la ong ba ka kong Fenela ka la kyntait ia kitei ki jingtyrwa namar ka jingsngew ieit ia u bah Hopingstone Lyngdoh uba dei ruh u ‘ma ieit’ jong ka bad ka la wan noh ban pyniasoh bad ka HSPDP.
Phi don ban ong eiei?