Ki jingïabeiñ ki jingïakhoh,
Ki jingïania, jingïakynthoh;
Ngi ju ïohsngew bad ngi ju bna,
Hapdeng balang khristan mynta.
Mynshwa ki shakri hok ï’U Blei,
Khristan kiba shisha ki dei;
Hynrei mynta sngewsih ban ong,
Khristan pynksan balang ki long.
Sngapthuh kumno ki ïapynksan,
Ym te ïa ka jinglong khristan;
Hynrei ïa ka balang lajong,
Ki pharisi thymmai ki long.
Ki kmen b’la don ha ka balang,
Ki pynksan ruh, “Jong ngi kham biang”;
Kin nym ïoh pat ïa ka jingim,
Lada kim don ki Soh Mynsiem.
Ngam tip, dei tang mano tharai,
Ban poi sha ka Hima U Trai?
Lada sarong riewblei ka shong,
Jingngeit poi bneng kan long khongpong.
Mynsiem Bakhuid Um treh ban shong,
Ha ki dohnud kiba sarong;
Haba kumta long lehnohei,
Jingksan balang ha ka pyrthei.
Kyndit bynriew! Nga ong ïa phi,
Namar ïoh lap ba sep ka sngi;
Ha shwa ba phin bishar, kynmaw,
U don U Nongbishar ba khraw.
Kynhun balang long kum ki tnad,
Ha met U Khrist, ki snoh ki bat;
Khlem U Jisu kim long ei ei,
Balang ba ïap shisha ki dei.
Mynsiem Um ong ba phin pynrem,
Namar baroh ban biang, te em;
‘La bun jingtlot, to ngin ïatei,
Para khristan ngin long kawei.
*(Da i Hopestarwell Snaitang, Seiñduli II, WKHD)
Phi don ban ong eiei?