Khring ka jingkieng, ba 80 metre, ia ki nongshang pyrthei

Mawrah:Ka shnong Mawrah, Rangtmah ka don ha kyndong, hynrei mynta ka la rung ha ka thup jong ki jaka jngohkai ba khring bha ia ki paidbah khamtam naduh ba ka shnong ka la shna ia ka jingkieng kaba jrong 80 metre ka pynkiang bad 50 metre ka kynjang ha Rangkylliaw, kaba ioh shynna kdiar sha ki them bad shaduh Bangladesh haba shai bha ka bneng.

Kane ka jingkieng la shna na ka skhim MGNREGS ne kaba ju tip kum ka skhim 100 sngi bad ka shim por lai snem eiei haduh ba kan ieng kynjreng bad la shna hi ki nongshong shnong.
Ban tip kumno la shna bad kumno la pynwan dur ia kane ka jingkieng, la ioh ban iakren bad u bah Rogest Diengdoh uwei na ki nongshong shnong uba iadon bynta ha kane ka kam.

U bah Rogest u la ong ba ka jingthmu ba shna ia kane ka jingkieng ka long ban khring ia ki nongwankai na bynta ka jingmyntoi jong ka shnong ka thaw baroh bad ki samla. Ka jinglut ka la kot kumba 1 klur tyngka eiei bad ka shim por lai snem.
“Ka jingsdang ia ka jingshna ia kane ka jingkieng ka long ban pynlong kum kawei na ka jaka peit kai bad na ka liang ka shnong naduh u 2013 ka la sdang ban tih surok ha Mawrah da ka jingthmu ban khring ia ki nongpeit kai,” la iathuh u bah Rogest.

Ka jingwan tuid ki briew sha katei ka jaka, ka jur bha ha ki sngi saitjain bad sngi u blei, wat la ki dang bun ki jingdonkam ban pynitynnad shuh ia katei ka jaka bad kiwei ki jaka peitkai.