Khreh mih sa ka UDP na ka shatri KHUDA ha KHADC

Shillong, 5 Naiwieng:
Hadien ba la mih noh ka HSPDP na ka shatri ka KHDA ha KHADC, sa ka UDP kaba rieh tngen lang ha kane ka shatri jong ka Congress, mynta ka la don ka jingpyrkhat halor kane. Ka UDP ka la pan ia ka kaiphod na u nongialam ka Parliamentary Party (PP) ha KHADC u Bah Remington Pyngrope halor ka jinglong ka sain pyrthei ha ka Council.
“Ngi la khmih lynti ban ioh ia ka jubab la ban bteng ne em ia ka jingkyrshan ia ka Executive Committee ba la ialam da ka Congress ka Khasi Hills United Democratic Alliance (KHUDA) ha KHADC, bad ia kane yn sa iakren hadien ba la ioh ia ka kaiphod na u Bah Pyngrope”, la ong u working president ka UDP u Bah Paul Lyngdoh ha kane ka sngi Hatmajai.
U Bah Paul u la ong ba ka PP ha ka KHADC kan sa iakynduh lashai ka sngi Balang hadien ka jingialang jong ka State Election Committee.
“Ka dur ka dar kaba shai kan sa paw lashai ka sngi hadien ba la wai ka jingialang”, la ong u nongaiktien ka UDP.
Shwa ia kane, lai ngut ki MDC ka HSPDP ki la weng noh ia ka jingkyrshan na ka shatri ka Congress ha KHADC hadien ba ki la kam ba ki la shah shet halor ka Inner Line Permit (ILP).
Ka rai jong ki lai ngut ki MDC ka HSPDP kynthup u EM Bah LG Nongsiej, Bah KP Pangngiang bad u Bah Enbin K Raswai ban weng noh ia ka jingkyrshan ka long ka jinglyngngoh hadien ba kim kyrshan ia ka resolution halor ka ILP hapoh ka iing dorbar. Hynrei hadien shi sngi, ki la pynbna ba ki la mih syndon na kane ka shatri ka Congress.