Shillong: Ka Ryntih Sports Club na kane ka nongbah Shillong, ka la pynkhreh ban leit shut reng ha ka lympung bah ialehkai phutbol ki klob barit ha ka ri, ka Second Division I. League.
U President jong ka klob u bah Wallam Kharpran uba dei ruh u President ka Seng Samla Mawlai Mawdatbaki, u la iathuh ia kane, ha ka jingialang pynkyup burom ia ki rang ialehkai hadien ba ki la ioh ba kin rah ia ka nam lahduh ka lympung ialehkai phutbol ba la tip ia ka kum ka 9th All India Chief Minister Gold Cup international Football Tournament 2020, kaba la long ha ka u bnai Kyllalyngkot mynta ka snem ha Sikkim.
Ha ka jingiakhun ia ka phainal, ka Ryntih SC ka la lah ba kan pynliem noh ia ka Oil India da 2-1 bad ia kine ki artylli ki kol jong ka Ryntih SC la thep ia ki da u Hardycliff Nongbri bad u Banpynkhrawnam Nongkhlaw.
Dei hadien ka jinglah ban ioh rah ia ka nam lahduh jong kane ka lympung, hynne ka sngi Hatmajai jong ka taiew, ka klob ka la lah ba kan da pynlong syndon ia ka jingialang ban pynkup burom ia ki player, ha ka jingialang ba la pynlong ia ka ha Shillong Polytechenic Auditorium.
Kongsan ba la wan ban don lang ha kane ka sngi dei u MDC Mawlai Constituency u bah Teiborlang Pathaw, ryngkat ka jingiadon lang u Rangbah Shnong, u Secretary Shnong, ki dkhot nongkit kam jong ki sengbhalang ka dong bad kiwei kiwei.
Phi don ban ong eiei?