Khreh ka komiti ban aiti ia ka kaiphod 8th Scheduled

Shillong, 07 Iaiong:
Ka komiti ba saw ngut ki dkhot ba thaw da ka sorkar jylla halor ka jingwad bniah ban pynrung ia ka ktien Khasi ha ka Eighth Schedule ka riti synshar ka ri, kan sa aiti noh shen ia ka kaiphod sha ka sorkar.
“Ngi khmih lynti ban aiti ia ka kaiphod sha ka Special committee ha kano kano ka por shen shen. Ka sub-committee kan sa shim ia ka rai ba khadduh shwa ban aiti ia ka kaiphod sha ka sorkar”, la ong ka director ka tnad Art bad Culture ka Kong Matsiewdor War hynne ka sngi Hatmajai.
Ka Kong War kaba dei ka nongkhot ia kane ka komiti ka la ong  kane ka komiti kaba don saw ngut ki dkhot ka la dep ban pynkhreh ia ki jingdonkam.
 ”Ka kam ba kongsan ba la bynshet ha kane ka komiti ka long ban wad ia ki jingdonkam bad ki sakhi satar kiba donkam ban pynrung ia ka ktien Khasi ha ka Eight Schedule”, la ong ka Kong War.
Ki dkhot jong kane ka sub-committee ki long u Executive Chairman ka MBOSE u Bah EP Kharbhih, u Dr. Sylvanus Lamare na ka Sahitya Akademi bad u S. Quotient Sumer.
Ka sorkar jylla ka la thaw ia kane ka komiti ban pynsted ia ka jingthmu ban pynrung ia ka ktien Khasi ha ka Eighth Schedule ka riti synshar ka ri. Ia ka komiti kaba heh la khlieh da u Symbud Myntri Rangbah ka jylla u  Dr RC Laloo kaba don 15 ngut ki dkhot.
Nalor u Dr Laloo bad ka Kong War, kiwei pat ki dkhot jong kane ka komiti ki long  Ka kong Ampareen Lyngdoh, Bah Pynshngainlang Syiem, Bah Paul Lyngdoh bad u Bah Witting Mawsor kiba dei ki MLA. Katba kiwei ki bym dei MLA ki long u Dr Sylvanus Lamare na ka Sahitya Academy, Dr DRL Nonglait na ka Khasi Authors’ Society (KAS), ka Dr Streamlet Dkhar, u secretary  ka law department bad u principal secretary  ka tnad Arts bad culture.