Khreh ka Congress ban pynhap jubor ia ka EC PDF:Shylla

Shillong, 28 Jylliew:
U Bah HS Shylla, u pyntip, ba ula ioh khubor, ba ka Sorkar Congress u Mukul Sangma, ka la pynkhreh ban pynhap jubor ia ka Executive Committee jong ka PDF ba la ialam da U Bah PN Syiem, CEM bad ban thung da u Administrator kat haduh ba la wallam ia u stad-ain ba kyrpang na New Delhi ban ai buit ia u myntri rangbah, halor kane ka jingthmu.
U Bah Shylla, ula ong mynta ka sngi, ba ka KHADC kam dei ka tnat treikam ne Department jong ka Sorkar Jylla, namar ka dei ka Autonomous Body, ka Sorkar Jylla kam lah ban niew ia ka District Council kum ka Department jong ka. Ka jingujor jong ki MDC liangpyrshah (UDP,Congress, HSPDP, Indpendent) ha kane ka kynti ka dei halor ka jingkynnoh ba u lamphang dorbar, u pynkhein ia ka AD Rules 71 (2) namar ki khlem pule ia ka Proviso jong kane sub-rule kaba ai bor ia u lamphang ban pynbeit ia ka por ha ka jingibit jong u, nalor ba la shim ia ka jingsngew (sense) jong ka Iing Dorbar ban leh kumta ha ka janmiet 21tarik Jylliew 2017.
U Bah Shylla, ula ong shuh shuh ba ki liang pyrshah ki don tang 12 ngut bad ba ka mission jong ki ban tan ia U Bah James Sylliang bad Kong Grace Mary Kharpuri ka treikam, wat haba ki la tyrwa ha ki da ka shuki CEM bad Dy.CEM bad dei namarkata ba ki shu phet jyndat noh na Iing Dorbar bad ai daw ba pynkhein u Chairman ia ka Rule 71 (2). Ban bret ne pynhap ia ka EC namar ka jingbakla u Chairman ka long kumba pynshitom ia u kpa haba leh bakla u khun; haba leh bakla u Chairman dei ban wan rah da ka rai ban pynkhyllem noh ia u lamphang dorbar lane leit sha High Court. “Lada u Mukul Sangma u pynhap jubor ia ka EC jong ka PDF la dei ban pynkylla kyrteng noh ia ka Meghalaya sha ka Mukulaya” ong shuh U bah Shylla. U Bah Shylla, u ong shuh shuh ba U Mukul Sangma u kwah ba ki MLA Khasi baroh kin bud ia ka nuksa U Bah HDR Lyngdoh ban doh ia ka kti jong u bad ka UDP bad HSPDP khlem da poi pyrkhat ki la leh ia kane, kaba sah mynta dei sa tang ka PDF marwei. “Nga pynmih ia kane ka jingthoh shwa ba kaei kaei kaba sniew kan jia” pynkut ka kyrwoh U Bah Shylla.