Khot ka KHADC, sha ka Tamasa Monolith lem bad ki riam tynrai

Mawphlang,23 Risaw:
Ban pynlong ia ka Tamasa Monolith kaba shongkun, ka Khasi Hills Autonomous District Council ( KHADC) ka la khot la wer ia ki paidbah ka bri u Hynniewtrep Hynniew skum, ba kin ia wan ban ia shim bynta ha katei ka Tamasa kaba nyng kong eh kaba la pynlong kyrpang ban pynneh pynsah ia ka jinglong tynrai bad ka kolshor jong ki Khasi. Ka KHADC lyngba u CEM bad EM ki la kyrpad ia ki paidbah ban wan sha katei ka Tamasa kaba ym don jingsiew eiei ban rung ryngkat ki riam ki beit Tynrai khnang ba ka Tamasa kan long kaba shongkhia.
Haba kren sha ki nongthohkhubor , mynta ka sngi ha ka por ba ka KHADC bad ka Khasi Heritage Conservation Forum, KHCF ka leit ban jurip ia katei ka jaka ban pynlong ia ka Tamasa ha Mawphlang, u Bah Pynshngain N Syiem, CEM ka KHADC u la ong ba ha katei ka Tamasa naduh ki pela dihsha ki pliang ja yn pyndonkam kum ha ki por mynshuwa, kata da ki ktang siej bad ki sla. Shuh shuh ki EM kiba la ia donlang bad u CEM ki la ban jur ia ki paidbah kiba wan na kylleng ki Hima ba kin ym pyndonkam ia ki kynja plastik hapoh ka Campus jong ka jaka ban pynlong ia ka Tamasa ha kaba ki la ong ba baroh la khmih lynti ba kin pyndonkam tang da ki tiar ki tar tynrai, u CEM u la ong ba kan don ruh ka shad Tynrai ha kaba la khot sngewbha ia baroh ban wan ia shim bynta ha katei ka shad ryngkat ki riam Khasi kiba paka ha kaba kin don ruh ki nongai jingmut ia ki nongshad ha katei ka sngi.
Ar sngi shuwa ban sdang ia katei ka Tamasa ha ka 25 tarik mynta u bnai , ka kynhun ki EM ka KHADC kiba kynthup naduh u CEM Bah Pynshngain N Syiem, Bah Titos Chyne Chairman KHCF, Bah Antonio War, u EM ka pla tyngka ka KHADC, u Bah J.Tynsong EM, kong Irene Lyngdoh, kong Grace Kharpuri bad kiwei pat ki EM ki la ia donlang mynta ka sngi ba la wan jurip ia ka jingpynkhreh na ka bynta ka Monolith Festival.
Kham ha shuwa ia kane ka KHADC ka la kyrpad ia ki sengbhalang ba kin ym khot pakhang shnong, ha kitei ki sngi ba la buh ban pynlong ia katei ka Tamasa, mynta ruh sa shisien biang ka la kyrpad jur ia ki sengbhalang ba kin ym khot iakhih ha ka kitei ki ar sngi khnang ba ki paidbah ka bri u Hynniewtrep kin ioh ban ia wan shim bynta ha katei ka Tamasa kaba heh ba la pynkhreh ban pyni ia ki jinglong tynrai bad ki kolshor jong ka jaitbynriew.