Shillong: Ka Empower Committee on Women jong ka iing dorbar ka jylla, ka la khot hajir ia u Chief Secretary, bad kumjuh ia u Director General of Police (DGP) bad kiwei ki tnad sorkar ban iathir ban thaw ia ki lad ki lynti ban iada ia ka jingshah ban bein ki kynthei ki kynnah ha ka jylla.
Haba kren sha ki lad pathai khubor, ka kong Ampareen Lyngdoh, MLA kaba dei ka chairperson ka Committee, ka la ong ba ha East bad West Garo, ka jingkhlad ki khyllung ba dang kha bad ka jingkhlad ki kynthei ka jur bha. Ka la ong ba tang ha West Garo Hills ka la don palat spah tang hapoh hynriew bnai kiba khlad ki longkmie namar ka jingpang duna snam namar ka jingbym biang bam.
“Ngi la wan jgnoh ia ka thain Garo Hills, ha kaba ngi la lap ba ka jingshah lehbein ki kynthei ka jur bha, ka jingkhlad ki khyllung ba dang kha, ka jingkhlad ki longkmie nalor ka jingshongkha khynnah”, ka la ong ka kong Ampareen.
“Ki bun bah ki kynthei kiba khlem ioh ban pynrung kyrteng ialade ha ka MHIS-IV ban ioh ka Smart Card ban ioh jingmyntoi haba pang ne shitom.
Kumjuh ka la iakren han kaba la pynpaw ba ki don shibun ki jingjia ha kaba kito kiba ngat ha ka ain POSCO ruh kila lait jamin noh tang shipor.
Katkum ka jingong ka kong Ampareen ka jingshong kha khynnah ne ka jingarmet kloi bad kane ka la ktah ia ka longiing bad ia ki kynthei ban tei ia ka jingim ha ka rukom kaba dei.
Na ka liang u bah HM Shangpliang uba dei u dkhot ka Committee, u la ong ba ka Committee ka la ai jingmut ia ka sorkar ba ka dei ban buh ia ki jaka pynlait ia ki samla kiba la ngat ha u drok ha baroh ki district namar ba haduh mynta ka sorkar kam pat don. U la ong ba kane ka la wanrah ka jingeh ia ki samla kiba ngop ha u drok namar ba kin leit sha ki jaka jong ki kynhun bym dei sorkar, ka la rem palat bad sha Shillong ka jngai palat na kiwei ki jaka.
La iathuh ba ka Committee shen kan leit ban jngoh ia ka jaka buh ia ki kynthei bad ia ki kynthei ha ki bnai ban wan ban peit ia ka jinglong jingman jongki.
Phi don ban ong eiei?