Khot jingialang sop sop ka UDP Ranikor

Shillong, 5 Naiwieng:
Na ka liang jong ka UDP Youth Wing Ranikor Circle, ka sngewpyrshah jur halor ka jingkhot jing ialang sop sop jong u Bah Khranglin Lyngkhoi, President jong ka UDP Ranikor Circle la shai ka sngi, ha Shillong khlem da pyntiplang ia baroh ki dkhot bad nongkitkam jong circle. Katei ka seng, ka pynpaw ia ka jingsngewlyngngoh shuh shuh ka long ba u la khot ia kane ka jingialang tang ia kito ki dkhot ba u sngewtynnad ha ryngkat bad ka bai nongsngi. Katei ka kyrwoh, ka ong ba ha ka jingshisha u ladei ban khot ia ka jingialang hapoh ka Constituency la jong, hynrei namar ba u don ka jingthmu barieh jong u ha ryngkat bad katto katne ngut kiba ha syndah jong u na ka bynta ban pynithuh ia u briew u ba ki thmu ban pynieng candidate ha kane ka MDC Election, 2014. U ne u briew ba ki thmu ban pynieng u dei u President jong ka UDP Nongjri Zonal Unit bad ha kane ka MLA Election ba dang shu dep shem u la ia leh pyrshah ia ka party da kaba leit kyrshan ia ka Congress bad na ka Polling Station Kulang jong u ka UDP ka ioh tang saw votes.
“Ngi na ka liang jong ka Youth wing ngi dap da jingsngewkhia kaba khraw halor kane ka jingleh jong u President namar ioh ba kan ia lam sha ka jingpynpait pynpra ia ka Party kaba la sdang wan dur bad nangroi katkum ba paw ha kane ka MLA Election ba dang shu dep namar ba ka seng Lyngba U Bah PK Raswai ka la shah rem tang da ki 400 votes ei ei” ong shuh ka kyrwoh na U bah DE Turnia President UDP Youth Wing Ranikor Circle.
Katei ka shnat jong ki samla, ka kyntu ia ki dkhot, nongkitkam bad sha baroh ki nong kyrshan baieit jong ka UDP ba kim dei ban shah ialam bakla ha kum kine ki nongialang kiba pyrkhat tang na ka bynta ka jingmyntoi shimet ym na ka bynta ka bha ka miat jong u paidbah.