Khot ïatainia ka HYC ia U Conrad, halor ka MOU bad ka Assam

Shillong:Hadien ba ka HYC, ka la pynlong ïa ka jingïalang pyrshah MoU ha sor Nongstoiñ ki la don ki kynhun saiñ hima bad ki nongbud jong kine ki party kiba la kren ba na ka liang ka HYC ka pyrshang ïalam bakla ïa ki paidbah halor ka MoU ïa pynbeit pud hapdeng ka Meghalaya & Assam.

Kine ki Seng saiñ pyrthei bad ki nongkyrshan jongki, ki la kren shane shatai ba kata ka MoU ka long kaba dei bad kaba bha shaba palat bad ki la kob ruh ba dei tang ka Party jong ki kaba nud ban ïa pynbeit ïa u pud bad ka Assam.

Ka HYC ka kwah ban kren shai ba kam shym la ïalam bakla ïa ki paidbah lane kam shym la pynthut ïa ka jingthmu ka Sorkar Meghalaya ban ïapynbeit ïa u pud u sam hapdeng ka Meghalaya bad Assam.
Ka HYC ka kwah ban ong ba kum ka seng kim donhok ban ïalam bakla ïa ki paidbah bad ha kajuh ka por ki Minister lane ki MLA ruh kim donhok ban pynksan jubor ïa ka bym dei. Khnang ba kan long kaba shai bad ka bym don jingnoh shiliang (Fair) ka Seng ka kloi ban ïatai haba shit haba shai ka sngi halor kane ka MoU.

Ka HYC ka dei ka seng kaba burom ïa ki paidbah bad ïa ka sur jong u paidbah te kan pynlong da ka jingïakob pynshai paidbah lane ka jingïatai nia paidbah (Public Debate) halor ka MoU ïapynbeit pud hapdeng ka Meghalaya bad Assam. Ka Seng kan sa buh ki nongkren ban kren pyrshah ïa ka MoU bad la kyntu ïa u Chief Minister, ki Minister bad ïa kito kiba soi ne kyrshan ïa ka MoU ba kin wan ban pynshai lane pynksan ïa ka MoU kaba ki la dep soi.

Ka seng ka kwah ban kren shai ba kam kwah ban ïatainia bad ki briew ki bym don bynta ha ka jingsoi ïa ka MoU lane ki bym don bynta ha ka jingïakren pynbeit pud bad ka Assam. Kumta, yn pdiang tang ïa u Chief Minister lane ki minister lane ïa ki MLA ba kin wan mihkhmat ban kyrshan ïa ka MoU lada don. Yn buh mar lai ngut ki nongkren, kata lai ngut ki ban kren kyrshan ïa ka MoU bad laingut ki ban pyrshah, bad yn ai por mar 15 minit uwei u nongkren.

Ïa ka Jingïatai nia kaba nyngkong halor ka MoU yn pynlong ha Patharkhmah, Ribhoi District ha ka 30.8.2022 ha ka por 12 baje nohphaisngi bad yn sa buh sngi ruh ha Shillong bad ha kiwei ki jaka kum ha Rambrai, Riangdo bad kiwei.
Lada jia ba na ka liang jong u Chief Minister lane ki Minister ne ki MLA kiba soi lane rai ban soi ïa ka MoU kim wan ban ïashimbynta, ka Seng kan pynlong kan ïaid shakhmat ban pynlong la ka jong ka program ban pynshai paidbah bad pyrshah halor katei ka MoU kaba long pyrshah ïa ki Hima Khasi, ong ka kyrwoh na u Bah Roy Kupar Synrem, General Secretary, HYC:CEC.