Khot iakren noh ia ka HNLC, ong u Bah Process

Shillong, 30 Risaw:
U MLA barim ka Mawlai Bah Process T.Saw kmie ula ong ba ka sorkar ka dei ban khot iakren noh ia ka seng lehnoh HNLC sha ka miej.
U Bah Process u la ong ba kyntu ia ka Myntri kam pohiing ka Jylla Kong Roshan Warjri, ba kan shim ban wanrah noh ia ka kynhun Hynniewtrep National Liberation Council (HNLC) sha ka miej iakren iasuk bad ka Sorkar Jylla ne ka Sorkar Kmie.
“Kumno ka Sorkar ka pyneh ban khot iakren ia ka HNLC, kaba la iai pynsngew na ka por sha ka por ba ka kwah ban wan iakren iasuk” ong u Bah Process.
U Bah Process ula ong ba ka por kala poi ba ka jingialeh pyrshah kam wanrah ia kano kano ka jingmyntoi, hynrei tang da ka lynti ka jingiakren kaba lah ban wanrah ia ka jingiasngewthuh jingmut hapdeng ka Sorkar bad ka HNLC bad kaba lah ruh ban wan rah ia ka shongsuk shongsaiñ hapoh ka Jylla.
“Ka Myntri kam pohiing ka dei ban shimkhia ban khot iakren ia ka HNLC khnang ba ka suk ka saiñ kan wan biang ha ka Jylla” ong u Bah Process.
“Ngi la iohi shibun ki Nongialam Longkmie hapoh ka Ri kiba nud bad shlur ban shim ia kano kano ka rai kaba eh ha ka synshar khadar kum ka Sonia Gandhi, Mayawati, Jayalalitha bad nga kyrmen skhem ba i Kong Roshan ruh in shimkhia bad pyni ia ka sap nongialam bad ban plie lad ia ki samla na ka bynta ka bha ka miat jong ki” ong u Bah Process.
Ha kajuh ka por, u Bah Process ula kyntu ruh ia ka Sorkar ba ialam da u Dr Mukul Sangma ban pyrkhat thymmai halor ka jing dawa jong ki Sengbhalang ban pyntreikam ia ka ILP. Ula kyntu ruh ia ki Sengbhalang ba kin ieng rangbah shisha ha kane ka jing iakhih jong ki bad ba kim dei ban shongthait, ban tieng ne riej haduh ban da ioh ia u soh ka jingjop.