“Khot iakren” ne 24 tarik ka proseshon sha Secretariat:JACATAM

Shillong, 19 Nailur:
Ki nonghikai skul bad kolej ki la byrngem ia u Mukul ba lada ka sorkar kam khot iakren ia ki hapoh ka 23 tarik kin pynlong ka jingiaiaid paidbah ha ka 24 tarik sha Secretariat.
Haduh mynta ka sngi ki nonghikai kim pat ioh ktien eiei na ka sorkar la kan khot iakren ne em ia ki kumba ki ladep phah shithi kham mynshwa ban khot iakren shwa ka 23 tarik.
Lada ka sorkar kam khot iakren ia ki nongialam ka Joint Action Committee All Teachers Association of Meghalaya (JACATAM) ki nonghikai kin iaid beit ka jngiakhih ba kham jur hadien katei ka sngi, la ong uwei nonghikai hynne ka sngi.
Kham mynshwa ki nonghikai ki la rai ban pynlong ia ka jingiaiaid paidbah ha ka 24 tarik da kaba iawer lang ia baroh kiba sngewkhia ia ki nonghikai kynthup lang ia ki kmie ki kpa jong ki khynnah skul. Ki la rai ruh ban iakhih khlem buh por lada ka sorkar ka dang iai mynthi ia ka jingdawa jong ki.
“Lada ka sorkar kam khot iakren ha ka 23 tarik ka jingiaiaid paidbah kan long kaba heh tam ha ka jylla haba da ki phew hajar ki nonghikai na kylleng ki jaka jong ka jylla ryngkat ki kmie ki kpa kin tur sha Secretariat”, la ong shuh shuh uwei u nonghikai.
Hapoh ka shatri ka JACATAM ki nonghikai ki la pynlong ki jingiakhih bapher bapher hynrei na ka liang u Symbud Myntri Rangbah u Dr RC Laloo u iai sngap mynthi khlem khot iakren satia. Halor kane ki nonghikai ki la shim ia ka rai ba kim nym treh iakren shuh bad u Dr Laloo bad ki la phah shithi sha u Myntri Rangbah ba un tuklar ia kane.