Khot ia kren u MR ia ka MSSASA

Shillong, 30 Nailar:
Ka Meghalaya SSA Schools Association (MSSASA) Central Body ka la kyrpad ia ka Sorkar ban kyntiew tulop ia u nonghikai uba saw(4th teacher) uba hikai ha ki SSA Upper Primary School uba hap hapoh ka State plan, kynthup ruh ban pynkynriah ia baroh ki posts jong ki nonghikai SSA napoh ka State Implementation Society (SSA-SEMAM) shapoh ka Education department, ban ithuh ia ka kam ki nonghikai SSA bad kiwei kiwei, ki nongialam ka Meghalaya SSA Schools Association (MSSASA) Central body ryngkat ki nongmihkhmat na ka All Garo Hills SSA Schools Teachers Association (AGHSSASTA) ka synjuk kaba iatreilang bad ka MSSASA Central Body kin leit ban iakynduh ia u Myntri Rangbah ka Jylla hapoh Secretariat ha ka 31 tarik mynta u bnai.
Naduh u snem 2013 ka MSSASA ka la dawa ban kyntiew tulop ia ki 4th Teachers kiba don 1521 ngut ha baroh kawei ka jylla mar katjuh bad kiwei ki nonghikai SSA namar baroh ki iatrei kajuh ka kam bad ki pynlut kajuh ka kynta hapoh skul. Ia kane ka bynta jong ka jingiapher ka tulop u 4th teachers ka MSSASA ka la dep ruh ban iakren bad u Prof R. C. Laloo Myntri ka tnat pule puthi mynha ka 19 tarik u Risaw jong u snem ba la dep bad kumjuh ruh ha ka 19 tarik u Naitung mynta u snem.