Khot hajir ka Social Welfare ia ka ANEIGLPA halor ka ST U Dr.Mukul

Shillong,30 Lber:
Ka Under Secretary jong ka tnad Social Welfare ka kong M.Chyne ka la khot hajir ia u Tennydard M.Marak bad ka kynhun jong u na ka seng All North East Indigenious Garo Law Promoter Association ha ka 31 tarik mynta u bnai ha ka por 2 baje noh phai sngi ha Committee Room No.II, Room No. 317, ha Main Secretariat na ka bynta ban pan jingshai halor ka PIL No.SH5/2013 bad ka Special Leave Aplication (C) No.501 2014 bad kumjuh ruh halor ka Writ Petition (C) No.12 2014 ka State Level Committee Notice. Ia ka shithi ka sorkar ka la phah sha u Tennydard ha ka 22 tarik mynta u bnai bad ia katei ka juh ka shithi la phah sha u Edbirth D shira, General Secretary ka All northeast Indigenous Garo Law Promoter Association, sha ka Dr. Julina L R Marak, sha u Willing M Sangma General Secretary ka Wageasi Area Manda Mahari Association. Ha katei ka shithi la phah ruh ia ka kpoi Order Sheet kaba 20 tarik mynta u bnai.
U Tennard M Marak u la pan jingtip na ka Ing bishar ba ha khliehduh ka Ri ka Supreme Court ha ka 2 tarik u Nailar 2013 ban pynshisha la u Myntri Rangbah ka jylla u Dr.Mukul Sangma u dei ne-em u riewlum ( Schedule Tribe) bad ka Ing bishar ka la pyntip ia katei ka jingujor sha u Secretary ka National Commission Schedule Tribe, New Delhi ha ka 20 tarik u kyllalyngkot 2014 ha ka WP (C) No. 12/2014 ha kaba katei ka tnad ka la pyntip pat sha u Chief Secretary ka jylla ha ka 14 tarik u rymphang 2014 letter No. F.No.TDMM/1/2013 STFMG/SEOTH/RU-II. Katei ka shithi ka la bthah ia ka State Level Scrutiny Committee ba kan phah sha ka Commission ha ka 21 tarik mynta u bnai na ka bynta ban leit rah sha ka Supreme Court ha ka por kaba biang. Hadien ba la ioh ia katei ka shithi bad ba la bishar bniah ia ki kot ki sla ka Committee ka la khot ia kitei ki nongujor ba kin wan pynshaia ha ki jingthoh Affidavit lane ban ia kynduh dalade hi ha katei ka sngi ba la buh.
Lah ban pynkynmaw ba ka seng ANEIGLPA kham mynshuwa ka la kam ba u Dr.Mukul Sangma Myntri Rangbah ka jylla um dei u riewlum bad um dei u Garo, bad halor katei ka jingartatien katei ka seng hapoh ka jingialam u Tennydard ka la iaid shakahmat ban ujor ban pan ia ki jingshisha.