Khot hajir ia U Sordar Wahkhen

Shillong, 23 Iaiong:
U nongbishar ka high Court u Justice SR Sen u la khot hajir ia u sordar ka Wahkhen u bah Skhembor Khongjirem ha ka 29 tarik u iaiong , 2015 ha ka por 10:30 baje thik mynstep. Katei ka jingshah khot hajir u bah Khongjirem ka dei halor ka jingpynkhein jong u ia ka hukum jong ka High Court da kaba u dang bteng ban ai sertiphiket shnong sha ki nongshong shnong ba kin ioh pyndonkam ha ki bank account jong ki bad kumjuh ruh kiba aplai ia ka skhim sorkar bapher bapher. Ia katei ka jingkhot hajir u nongbishar u la pynmih mynta ka sngi ka 23 tarik u iaiong lyngba u Registrar General jong ka High Court, la khot hajir ba un pynshai balei ba katei ka hukum ka high court kam treikam ia u, la hukum ruh ia u Registrar General ba un rejistar case kam pynkhein ain ia u sordar ka Wah khen, bad la hukum ba ia ka jingpyntip sha u dei ban pyntip da u Superitendent of Police East Khasi hill bad ban jubab hapoh shi taiew. Bad ia ka kopi ka shithi khot hajir ban pynpoi sha u sordar.
Lah ban kdew ba katei ka jingkhot hajir jong ka high Court ia u bah Skhembor Khongjirem, sordar Wahkhen ka dei halor ka khubor kaba la mih ha ka 18 tarik u iaiong ha kaba dalade hi u la iathuh ba u dang bteng ban sertiphiket sha ki nongshong shnong, bad katei ka jingai sertiphiket jong u ka la iarap bha ia ki nongshong shnong.