Khot dorbar noh mardor ban iakren ia ka ILP, ong ki sengbhalang

Shillong:Ki seng Khasi Student Union (KSU), Federation of Khasi Jaintia and Garo People (FKJGP), Ri-bhoi Youth Federation (RNYF) bad ka Hynniewtrep National Youth Front (HNYF) ki la dawa na ka sorkar Meghalaya ban khot noh da ka ‘dorbar ba kyrpang’ ban pynlong ka jing iathir jing mut halor ka ILP ha Meghalaya.

U President jong ka FKJGP u bah W. Rani u lah ong ba kin buh por ia ka sorkar Meghalaya tang haduh 19 tarik Nohprah ban khot ia ka ‘Special Session’ bad lada ka sorkar kam pynbeit ia ka tarik na ka bynta ka ‘Special Session’ ki saw seng kin buh tarik hi ban khot ia ka ‘Special Session’.

“Ngin sa leit shaw hi ia baroh ki MLA jong ka Meghalaya khnang ba kin poi sha ka ing thawain ka jylla, lada ka sorkar Meghalaya kam buh ia ka tarik na ka bynta ka special session” lah bynrap u bah Rani.

Ki saw seng ki lah byrthen ruh ba ha kane ka ‘special session’ ka sorkar Meghalaya ka dei ban pynmih syndon da ka ‘Resolution’ ban dawa na ka sorkar India ban ai da ka ILP ha Meghalaya.

U president ka seng KSU u bah L. Marngar u la ong ba lada ka sorkar Meghalaya ka kwah ba ka jing iakhih kan jai jai noh ka dei ban shim noh da ka ‘resolution’ ban pyntrei kam da ka ILP ha Meghalaya.

Ha ba kylli shaphang ka jing mih ki jing klumar mynnin ka sngi u president ka KSU u lah ong ba ka sorkar ka dei ban kit khlieh hi namar ki paitbah ki lah bitar palat ia ka sorkar Meghalaya kham tam ia ka jing kyrshan ka Agatha Sangma ia ka CAB ha ing thaw ain ka ri India.