Shillong: Ka KHNAM ka la pyntip paidbah ba ka la sdang ban khot aplikeshon na ka bynta ki kyrtong MDC kiba kwah ban ia khun na ka seng KHNAM bad ia ka aplikeshon ki dei ban pynpoi sha ka ophis u President jong kate ika seng u bah Adelbert Nongrum kaba don ha Jaiaw Lansonalane, Shillong ha lane shuwa ka 31 tarik mynta u bnai, kane ka long na ka bynta ka KHADC bad JHADC.
Ki thong jong ka KHNAM na ka bynta ka elekshon MDC ki long ban ban pynbeit ia u pud u sam ka Meghalaya bad Assam, ban thung maw ha baroh ki pud ki sam jong ki Hima bad ki shnong da kaba pyndonkam da ka jingstad thymmai ka juk mynta. Ban shna ia ki Management Plan na ka bynta ki khlaw ki btap, ban pyniar ia ka ktien Khasi ban pyniaid ia ki Primary School katkum ki khyrnit ba 6, ban pyni shai kdar lyngba ki kor internet ban tip katno tylli ki Trading License ki District Council ki ai manla u snem. Ka KHNAM ka la kren shai ruh ba ka kwah da ki kyrtong kiba kut jingmut ban ym kyntiap seng ynda ki la sha jied na katei ka seng. Ka pyntip ruh ba ka kwah da ki kyrtong ki bym pynthame da ka pisa ne ka spah ka phew ban khring vote na ki paidbah.
Ka kyrwoh khubor na u bah THS Bonney General Secretary ka la pynpaw ruh ka jingsngewlyngngoh halor ka jingiai kam President jong u bah Pyndapbor thiaw Saibon ia ka seng KHNAM bad u la ong ba ka jinglong nongialam jong u bah Adelbert ka dei kaba la pynkupbor da ka Election Commission jong ka ri India.