Nongpoh: Namar ka jingbymioh jingiarap na ka jingshah pynjulor ha ki snem kiba la leit, ki paidbah nongshong ka Umtyrnga bad khamtam kito kiba la jur ka jingshah pynjulor, ki la kyntait bad khnium da kaba pynpaw ruh ia ka jingdom, ia kito ki briew kiba wan ban shondur ia ki jingjulor jongki.
Kawei na ki iing ha Umtyrnga kaba la shah rat ha ka Eriong kaba la khie ha u 2017 bad ia kaba kim pat ioh jingiarap na ka sorkar:Rupang
Haba pyntip halor jong katei ka jingkhnium, u Bah B. Khongtyngkut, Rangbah shnong ka Umtyrnga, u la ong ba kum u Rangbah shnong u dap da ka jingsngewkhia ban iohi ba ki paidbah ki khnium ia ki briew kiba wan ban shondur ia ka jingjulor kaba ki la shah pynjulor ha ki bor ka Mariang.
U la ong ruh, ba ka daw kaba la pynlong ia ki nongshong shnong ba kin dom ia ki briew kiba wan ban shongdur, ka dei hadien ba kim pat ioh ia ka jingiarap na ka sorkar halor ka jingshah pynjulor kaba ki la dep ban mad ha u snem ba la dep, namar ki paidbah kiba sah ha katei ka shnong, ha u snem ba la dep ki la mad ia ka jingshah pynjulor kaba jur bha ha ki bor ka Mariang, ia kaba kat haduh mynta kim shem la pat ia kano kano ka jingiarap na ka sorkar.
Namarkata, kum u Rangbah shnong nga buh ruh ia ka jingkyrpad ia ka sorkar ba kan ialeh kaba lah ban pynkloi ka jingiarap, na ka bynta jong kito kiba la mad ia ka jingshah pynjulor ha ki bor ka Mariang, u la bynrap.