Khluit ka jingiapyni nia tar hapdeng ka SSA bad ka SRGT

Shillong, 1 Naitung:
Ka la mih ka jingiapyni nia kaba khluit bha hapdeng ki dkhot ka Shillong Recreation Ground Trust (SRGT) bad ki dkhot ka Shillong Sports Association (SSA) halor ka jingkhang khyr dop ia ka jaka rung sha madan Polo da ka SRGT.
Haba kren sha ki nongthoh khubor u President ka SSA u Bah Bindo M Lanong u la ong, “Ka jingkhang khyrdop ia ka jaka rung sha madan ialehkai ka la pynwit ia ki riew ieid kynjatbol. Ngi la don hangne ban pynroi ia ka jingialehkai hynrei ka SRGT ki khang lad pynban”.
“Haei ka don kane ka Trust (SRGT) ha kine ki snem baroh, ki briew kim ju tip eiei wat ki nongialehkai ruh bad ki dkhot ka SSA kim tip ia kane ka SRGT”, la ong u Bah Bindo bad bynrap ba ki dkhot ka SSA ki la thaw ia ki lad ki lynti ban kyntiew ia ki jingialehkai khlem kano kano ka jingmih hynrei kane ka SRGT pat kim leh eiei ban kyntiew ia ki jingialehkai bad ki bunkam ia kiwei pat.
U Bah Lanong u la ong ba ka SSA kan iai bteng ban shakri ia ki samla bad ban kyntiew ia ki jingialehkai Khasi bad Jaintia Hills ha ka jylla bad ia ka jingbit jingbiang jong baroh ka jylla. U la ong ba kan don shuh shuh ka jingiakynduh hapdeng ka SSA bad ka SRGT bad ka sorkar jylla ban iakren ia kane ka kam. U la buh jingkylli kum kano ka kam ba ka SRGT ka la leh ia ka madan ialehkai. “Ha ki snem ba la dep, ki briew bad ki riew ieid jingialehkai ki rung ki mih khlem kano kano ka jingkhang hynrei ka jingtei khyrdop ha ka jingkhang ka mut ba ka la don pynban ka jingthut ha ka shong suk shong sain”, la ong u Bah Bindo.
Katba u Bah Danny Pariat u secretary ka SRGT u la ong ba “kane ka khyrdop la don bun snem hynrei ngim ju pyndonkam ban khang ia ka. Hynrei, haba ngi shimti ia ka ha u snem 2013 ka la don ka jingkyrpad na ki paidbah jong ki dong bapher bapher bad na ki pulit ba bun kiba pyndonkam bakla ia ka ban dih kyiad bad ban leh ia ki kam sniew bad na kane ka daw, ngi la pyrkhing ia ka jingrung ki briew”. U la ong ba ha ki bnai ba la dep shwa ban shimti ia ka, ka SRGT la lap ba don kiba shah pyniap ruh ha kane ka jaka. “Hynrei shisien ba ngi la pyrkhing ia ka jingrung jong ki briew, ki pulit ki la pynthikna ba ki kam sniew ruh ki la duna bad kim don shuh ha kane ka jaka” la kam u Bah Pariat.