Khluit ka iing dorbar Jylla, halor ka jingkiew dor ka doh masi

Shillong:U Myntri u ba dei khmih ia ka tnad Animal husbandary bad Veterinary jong ka sorkar jylla u bah Sanbor Shullai ha ba jubab ia ka mat iatai kaba la wanrah, da u MLA ka Umroi Constituency u bah George B Lyngdoh, halor ka jingkiew ka dor jong ka dohmasi na ka jingpyn trei ka jylla Assam ia ka Cattle Prevention Act 2021 u la pyntip ba ka tnad ka dang pyr shang ban ioh symbai da ki masi Ongole ban pynkhlain ia ka kam ri masi ha ka jylla.

U la ong ba ka jingwan rah ia kine ki masi kan long ban pynkhlain ia ka jingri masi bad ban ym sha niah ia kiwei pat ki jylla ban pynbiang ia ki masi ia ka jylla.
U Myntri u la iathuh ba haduh 280 tylli ki permit ba la ai ia ki nongkhaii masi ban pynpoi masi sha ka jylla.
Ha ka jingiakren, ba la wan rah da u MLA ka Umroi Constituency u bah George B Lyngdoh u la wanrah ia ka mat iatai halor ka jingeh kaba la mad da ki nongkhaii masi na ka daw ba ka jylla Assam ka la pyntrei kam ia ka Cattle Prevention Act 2021 ha kaba ka la wan rah ia ka jingeh ia ki nongkhaii masi ban wanrah masi na ka jylla Assam sha Meghalaya.

Kat kum kane ka ain ha ka jylla Assam, kaba la pynjynjar ia ka jingwan pynpoi ia ki masi ha ka jylla ha kaba ka la ktah ia ka dor jong ka doh masi.
U bah George u la kynnoh ruh ba ka ne ka dei tang ka buitpoh jong ka sorkar ba la ialam da ka party BJP-ban khang lad ia ki nongshong shnong ha ka jylla Meghalaya ban bam ia ka dohmasi.
Halor kane ka mat na ka liang u MLA ka AITC u bah HM Shangpliang u la ong ba kat kum ka jingioh jingtip na ki nongshohdoh, kane ka jingduna ban ioh wan rah ia ki masi sha ka jylla ka la pynkiew dor ia ka dohmasi ha ka jylla.

Na ka liang u MLA ka Congress, u bah Process T Sawkmie ruh u la pynpaw ia ka jingmynjur halor ka ne ka mar da kaba ong ba ka dor jong ka dohmasi ka la poi sha ka T.400 haduh T. 450 shi kilo katba ka dor jong kawei ka masi rit ka poi sha ka T.20,000, katba ki masi heh ki la poi sha ka T. 80,000 haduh T. 90,000.
U la kyntu ruh ia ka sorkar ba ka dei ban shim khia ban talasi ia ki briew ki ba ju shalan tuh ia ki masi na ka jylla Assam.