Khluit ka iew dohsnam Laitlyngkot, ha ka tamasa ha Mawphlang

Shillong:Ki nongdie dohsnam na Laitlyngkot ha ka Monolith Festival-2024 ba la pynlong ha Mawphlang, mynta ka sngi ki la pynpaw ba ka iew ka la kham iaid bha namar ki paidbah ki la wan ban ieng lain ban ia thied dohsnam.

Ka Monolith Festival ha Mawphlang ka la iaid mynta la ar sngi ka ba la sdang hynnin ka sngi, ha ka ba la wan ban plie pyrda da u symbud Myntri rangbah ka Jylla u Bah Prestone Tynsong bad yn pynkut lashai ka sngi saitjaiñ.
Haba ioh ban iakren bad ki nongshong die dohsnam na Laitlyng kot ki la ong ba ka iew mynta te ka kham biang bad ki nongthied ruh ki la wan bha ban mad ia ka dohsnam Laitlyngkot, namar ki la bna pyrthei ba ka dohsnam na Laitlyngkot ka long kaba bang haduh katta katta.

“Ki la ong ruh ba ki dang rah tang 8 kilo u dohsnam ban die, hynrei ki iohi pat ba ka iew ka la iaid bha bad haduh ban da dum ki la lah ban die lut baroh”. “Na ka liang ki paidbah kiba wan thied ki iaroh bha ia ka dohsnam namar ka long kaba la bang palat, bad ka long pher na kiwei ki dohsnam, hynrei ki ud pat ba ka dor ka la rem eh, bad ka jingdie rem ia kane ka dohsnam ka long namar ba ka bai dukan ruh ka la rem lypa,” la bynrap ki nongdie dohsnam.

Ki la ong ruh, ba ka jingpynlong ia kane ka Monolith Festival ka ai jingmyntoi haduh katta katta ia ki, khamtam ki nongdie namar dei lyngba kane ka Festival ki paidbah na kylleng ki jaka kin tip ba don ka dohsnam kaba bang bha napoh Laitlyngkot khang ba kin wan ban thied shuh shuh ha ki sngi ban wan.