Nongpoh: Haba pynpaw ia ka jingsngewkhia halor ka jingwan khlong shyiap ki briew na Assam ha ka Wah Umsiang, ki dkhot ka RBYF na ka Umtrai Circle bad Umsiang Unit, ki la leit ban jurip ia ki jaka khlong shyiap beain da ki briew na Assam, ha ki jaka kiba dang hap hapoh u pud u sam ka Meghalaya.
Ha katei ka jingleit jurip kaba la sakhi da ka jingdon ki nongialam ka RBYF, Sengkmie lem bad ki nongkitkam ka Umtrai Circle bad Umsiang Unit, kaba kynthup ia u Bah Wanphai Lyngkhring, u Bah C. Shadap lem bad kiwei kiwei.
Ka daw hi kaba la pynlong ia ki nongialam ka RBYF ban leit jurip sha katei ka jaka, ka dei hadien ba ki la ioh ia ka jingujor na ki paidbah kiba shong ba sah ha katei ka thain, kiba la ujor halor ka jingma kaba ap na katei ka jingwan khlong shyiap beain da kitei ki briew na Assam, namar ka jingkhlong shyiap ha katei ka Wah kan lah ruh ban wanrah jingma ia ka jingkieng Umsiang, kaba dei ruh ka jingkieng ka pyndonkam da ki briew kiba shong ha katei ka thain.
Hadien katei ka jingjurip, na ka liang ki nongialam ka RBYF, ki la kyntu ia ki Bor distrik ka Ri Bhoi ba kin shimkhia mardor ha ka ban khang noh ia katei ka jingwan khlong beain da kitei ki briew na Assam.