Khlieh U Prof Laloo, ia ka komiti ka ktien Khasi ha 8th Scheduled

Shillong, 2 Nohprah:
Ka sorkar jylla ka la thaw ia ka komiti ban buddien bad ka sorkar pdeng na ka bynta ban pynrung ia ka ktien Khasi ha ka khyrnit ba phra ka riti synshar ka ri bad ia kane ka komiti la khlieh da u Symbud Myntri Rangbah ka jylla u Prof Roytre C Laloo katba ka director ka tnad pynneh ia ka riti dustur ka Kong Matsiewdor W Nongbri kan long kum ka member secretary jong kane ka komiti kaba la pynbna la thaw ha ka 28 tarik Naiwieng.
Kiwei pat ki dkhot jong kane ka komiti ki long ka myntri sor ka Kong Ampareen Lyng doh, u MLA ka UDP u Bah Paul Lyngdoh, u MLA ka Congress Bah Pynshngain N Syiem, u MLA ka HSPDP u Bah Witting Mawsor, u Principal Secretary ka tnad ba peit ia ka riti dustur, nangta u Dr Sylvanus Lamare uba dei u principal ka St Edmund College bad u dkhot ka Sahitya Akademi, ka khlieh ka tnad Khasi na NEHU, u Executive Chairman ka MBOSE u Bah EP Kharbhih, u dkhot barim ka Sahitya Akademi u Bah S Quotient Sumer, u secretary ka tnad kam ain u LM Sangma, ki dkhot na ka Khasi Author Society bad u MP barim u Bah BR Kharlukhi.
Lah ban kdew ba ha ka dorbar tlang kaba dang shu kut shen, u Myntri Rangbah ka jylla u Dr Mukul Sangma u la pynbna ban thaw ia kane ka komiti ban buddien wut wut bad ka sorkar India na ka bynta ban pynrung noh ia ka ktien Khasi ha ka khyrnit ba phra ka riti synshar ka ri.