Khlieh U bah Prestone ban iasyllok paidbah Halor ka ain shongwai iing

Shillong, 25 Risaw:
Na ka bynta ban ioh iakren ha ka lympung kaba kham iar bad ba yn ioh ban shim jingmut lem na ki nongsynshar shnong, ki nonghikai, ki riew shem phang, ki sengbhalang bad ki samla ha ki 11tylli ki District jong ka Jylla, ka sorkar ka la thung ia ka komiti ban khlieh da U bah P Tynsong myntri kam pynroi nongkyndong ka sorkar Jylla, ha ryngkat bad U Clement R. Marak, myntri bor ding, kong Dr M. Ampareen Lyngdoh, myntri pynroi sor, Bah R.V.Lyngdoh, MLA, Bah Kennedy Khyriem, Parliamentary Secretary, Bah Justine Dkhar, Parliamentary Secretary bad U Cherak W.Momin, Parliamentary Secretary, ba kin long ki dkhot ki ban shim bynta lang ha katei ka jing ia syllok ha ki jingleit bapher bapher.
La khot namarkata ia ki paidbah, ba kin ia shim bynta khnang ha kitei ki jingialang, ha kaba ia ki tarik, yn pynbeit da ki deputy commissioner bapher bad ban ioh ia ka ain, kaba dei ban khanglad shisyndon ia ka jingwan tuid ki bar Jylla.
Yn pyllait paidbah ia ka jingtreikam jong katei ka komiti, ha ka 1tarik Naiwieng 2013, ha kaba yn plie da u myntri rangbah ka Jylla, ha ka 1tarik Naiwieng 2013, ong ka kyrwoh ba la phah da U Commissioner & Secretary jong ka tnat Political jong ka sorkar Meghalaya.