Khlem treikam ka pakhang ophis ka HNLC

Shillong, 8 Jymmang:
Ka pakhang ophis ba la khot da ka seng lehnoh ka Hynniewtrep National Liberation Council (HNLC)kaba sdang mynta ka sngi Palei kaba dei ka sdang ka jingkhot pakhang ophis kam shym la treikam satia ha kaba ki ophis ki la plie bad ki nongtrei ki wan thikna.
U SP ka East Khasi hills Bah M Kharkhrang u la iathuh ba kam shym don kano kano ka jingjia ha kano kano ka bynta jong ka district bad ym don mano mano ruh ba shah kem.
Ka HNLC ka la khot pakhang ophis saw sngi ha ka 8, 9, 12 bad 13 tarik namar ba ka sorkar kam shym la pynlait ia u president ka Hynniewtrep A’chik National Movement (HANM) Bah Lam phrangsngi Kharbani bad saw ngut kiwei pat kiba shah kem ha ki pulit.
Ki bor pahara ki la pynlong ia ka jingap ha baroh kawei ka nongbah ha kane ka sngi ba don ka jingkhot pakhang ophis ka HNLC.
Ki ophis ha Khasi, Jaintia bad ha Ri Bhoi district la iathuh ba ki treikam kumba ju long khlem kano kano ka jingthut.
Ki Bank ruh ki treikam lait noh tang ha ka thain Mawlai ba ki khang.
U Aditional chief secretary u KS Kropha u la ong ba ka jingwan jong ki nongtrei sha ki ophis ka biang kumba ju long ha baroh ka Khasi, Jaintia bad Ri-Bhoi.
Ha East Khasi hills district ka jingpoi trei ka long 75 percent, West Khasi hills 90 percent, South West Khasi hills 87 percent, East Jaintia hills 80 percent, West Jaintia hills 81 percent bad ha Ri Bhoi district ki poi trei 80 percent.
U DC ka East Khasi hills u Sanjay Goyal u la iathuh ba ka jingwan ki nongtrei ha kane ka ophis ka long 95 percent bad kiba pep, dei namar ba ki shitom.