Shillong: Ka kynhun United Democratic Alliance (UDA) myn hynnin ka sngi, ki khlem leit iakynduh shuh ia u Lat ka jylla u Tathagata Roy namar ba um don ha ka nongbah. Ha ka jingshisha, ki la mut ban leit iakynduh ban dawa ba kila ioh ia ka jingbun paid ki MDC ha Khasi Hills Autonomous District Council (KHADC).
Namar bym don u Lat, la ioh jingtip ba kila shu ai noh da ka jingthoh bad kin sa leit kynduh ynda u la poi Shillong.
Ha kawei ka liang, la ioh jingtip ba ka sorkar kan sa phah biang ia ka jingai jingmut sha u Lat ka jylla ban pynjari da ka synshar Administrator Rule (AR) ha KHADC namar ba haduh mynta, ka la don hapdeng ka jingkynrum kynram.
Ka jinglong jingman ka sain hima sima hapoh ka Khasi Hills Autonomous District Council ka la nang sniew katba nangiaid ki por, na ka daw ba ym don ain ban tehlakam ki MDC ki iaid ha la mon lajong.
La iathuh ba ban khang lad ia ka jingioh shong CEM u bah Latiplang Kharkongor uba don hapdeng ka jingduna pait, ka lad ban weng ia u ka long da kaba shu pynjari da ka Administrator Rule katto katne por, bad sa khot pat da ka dorbar kyrpang ban iatynjuh bor ban weng ia u namar ba ka dorbar kan long slem haduh u Rymphang.
Ka United Democratic Alliance (UDA) ka la kam ba ka la don 15 ngut ki MDC hadien ba la wan iasoh u MDC ka Congress na Mairang u bah Batskhem Ryntathiang katba ka liang United Democratic Forum (UDF), ka la hiar sha ka 14 ngut kynthup ia u chairman hynrei lada lait u chairman ka la don tang 13 ngut ha ka iing dorbar kaba 29 ngut.
Phi don ban ong eiei?