Shillong 12 Rymphang: Ka seng Hynniewtrep Integrated Territorial Organization (HITO) Shillong city mynta ka sngi balang, ka 12 tarik Rymphang 2025, ka la leit ban buh da ka jingthoh hakhmat ka DC, East Khasi Hills District ka kong R M. Kurbah, ban ujor halor ka jingiaid lait ka Kompany “Book My Show” ba pynlong ia ka tamasa wan u Ed Sheeran u nongrwai bapaw ka pyrthei mynta ka sngi ha madan Jawaharlal Nehru (JN) Stadium, Khlem da pan ka jingbit ne NOC na u Rangbah Shnong ka Golf link.
Kane ka jingpynlong katei ka kompany “Book My Show” ia kane ka tamasa wan rwai u Ed Sheeran, kalong ruh ka jingpynthud ia ki khynnah ki ba dang long skul bad khamtam eh ki khynnah ki ba dangdon hapdeng ka jingpynkhreh ia ka exam SSLC.
Ha ka jingiakren bad ki lad pathai khubor na ka liang u president ka HITO Shillong City u samla Banpyntngen Syiemlieh u la ong, ba ka jingpynlong ia kine ki tamasa kam shem la ai jingmyntoi eiei, hynrei ka pynduh jingmyntoi khamtam ki khynnah ki ba pynkhreh ia kane ka exam SSLC, la kin khrehkot ne kin sngap ia ka tamasa bad kan pynwit ruh.
U la ong ruh, ba wat ki paradoh parasnam ki ba thmu shongdie dukan, la kalong ki marbam, ki dukan sha bad ja bad kiwei kiwei de ki dukan, kitei ki nongpyniaid katei ka tamasa kim shem la shah ia ki ban shongdukan.
Lada kane ka tamasa kam wanrah ia ka jingmyntoi na ka bynta ki nongshong shnong, kan myntoi aiu pat ban wanrah ia kita ki jingtem jongput ha ka jylla, ong u samla Banpyntngen.
U samla Banpyntngen la ong ong ruh, ba kane ka jingbymshah ia ki nongshong shnong ka jylla ban buh ia ki dukan jongki, ka la ktah shisha ia ka kamai kajih jongki.
Shuh shuh ula ong, ba katei ka Kompany ba pyniaid ia katei ka tamasa, ki la shu ai “No Entry” ha ki surok ki badei ban iaid khlem da tip paidbah, bad ka ba la ktah shisha ia ki khynnah skul ki ba wan thoh exam, nalor kata u la ong, ba kane ka kompany ka la iaidlait lut ja baroh ki liang, ban leh hi ia la kajong kamon.
Phi don ban ong eiei?