Shillong: Ka jingdon jong ki briew ba kwah ban seng kam seng jam na ka skhim Prime Minister Employment Generation Programme (PMEGP) ka duna shaba palat haba ianujor bad kiwei ki jylla ha ka ri.
Hynrei ha kajuh ka por, ki ophisar ki la kyntait ba kiba ioh ia kane ka skhim ki dei ki briew kiba la riew spah ne ki kontraktor klas I bad ki la kyntait ruh ba ki bank kim dam on ban ai ram ia ki samla kiba don thmu shisha.
Kumba long haduh mynta, ka jingdon ki briew kiba ioh skhim PMEGP ha Meghalaya ka long tang 8 percent kaba mut ba kiba bun ki samla kiba la nang la stad kiba seng kam ki duna bha kiba ioh na kane ka skhim ka sorkar pdeng kaba la thmu khnang na ka bynta ki samla.
Haba kren sha ki lad pathai kubor myn hynnin ka sngi, u Director jong ka Khadi Village Industries Commission (KVIC) u V S Bagul u la ong ba ka daw jong ka jinghiar ha kaba pyntrei kam ia ka skhim PMEGP hapoh ka jylla Meghalaya dei na ka daw bym biang ka internet.
Haba kren ha ki nongthoh khubor mynta ka sngi la ong ba kane ka skhim ka trei kam bha ha kiwei ki jylla na ka bynta ban iarap ia ki samla khamtam ha ki nongkyndong ba kin seng iala ki jong ki kam ki jam ban ieng hala ki jong ki kjat.
U la ong ba kane ka skhim hapoh ka jylla Meghalaya ka trei kam bha mynshwa hynrei hadien ba la pyndon kam da ka online, kala hiar bha ha kane ka jylla bad ha u snem 2018 kala long tang 8%.
Na ka liang jong ka KVIC ka kyntu ia ki samla ba kin wan shakhmat ban aplai ia kane ka skhim jong ka sorkar pdeng ban seng kam la jong namar ka don ka jingiarap pisa 35% ha ki nongkyndong na ka jinglut jong ka kam kaba u ne ka ki seng bad ha ki jaka sor ka long tang 25%.
Haba jubab ia ki jingkylli u Bah H Marbaniang u CEO jong ka MKVIB, u la ong ba ka jingjied ia ki briew ban ioh ia kane ka skhim ka long katkum ka kam kaba ki aplai ban seng ia ka kam bad ia kane la ju jied ia ki briew lyngba ka ophis jong u Deputy Commissioner lyngba ka Task Force Committee.
“Ia kiba aplai la jied da ka Task Force Committee na ophis Deputy Commissioner ba la don lang ki briew na Bank bad na DCIC”, u la ong.
Ki ophisar na DICI ki la kyntait ruh ba kiba ioh ia kane ka skhim ki dei na kito ki kontraktor klas I ne ki briew kiba la riew spah lypa.
Katba u heh jong ka SBI u G Bijoy Kunar, u la ong ba ka jingeh ka long ba bun sien hadien ba la mang ia ki skhim ki don ki samla ki bym treh shuh ruh ban shim bad ka jingbym lah jong ki Bank ban ai pisa namar ki skhim kim biang. “Ka bank ka jied ia ki briew ban ai ram katkum ka kam kaba ki lah ban ioh nong”, u la ong.
Kane ka jingkhot ia kane ka jingiakynduh bad ki nongthoh khubor mynta ka sngi ka long ban kyntu ia ki samla kane ka jylla ba kin wan shakhmat ban shim ia kane ka kabu ban ioh bai seng ia ka kam kaba ki kwah ban trei.
Katkum ka experience jong nga. Ka SBI Bank ka discourage bha ia ngi ban shim Loan na ka bynta ka PMEGP. Ha ka jaka ban pynshlur ne ban iarap ia nga, U Branch Manager ka SBI, Jowai Branch u ong ba lada nga lah ban mortgage ne ban invest kham bun (ka PMEGP ka don tang 5% own contribution) ban ia ka 5% te u ai loan, lym kumta te un ym ai loan. Ka dei na ka daw ba don ki bank bad manager ba kum kine kin sa duna kiba ioh skim lyngba PMEGP.