Khlem ioh bai nong, kiba trei 100 sngi ka shnong Pynter, ong ka CSWO

Shillong, 09 Nailar:
Ka Civil Society Women Organisation (CSWO) ka la ioh jingtip ba ki don katto katne ki briew kiba trei ia ka skhim shi spah sngi ne ka MNR EGS ha shnong Pynter kaba hap ha Block Development Office Pynursla, East Khasi Hills District, kim shym la ioh bai bylla watla ki la leit trei bad la dep soi ha ka muster roll.
Ka president ka CSWO ka Kong Agnes Kharshiing ka la ong ba kine ki briew ki dei kiba la trei ha u snem 2012-2013 hynrei ki la shah kyntait ban ioh pisa ia ka bai leit trei. Hynrei kaba sngew lyngngoh ka long ba wat ia ki jingtrei ba thymmai kiba ki khlem leit trei hynrei la phah soi pynban.
“Haba ki kyntait ban soi ia kaba khlem leit trei, ki la shah maham ha uwei u briew ba la tip kyrteng kum u Jebinstone Nongkrot uba dei u dkhot jong ka VEC (Village Employment Council) ba kin iakynduh jingeh ha ki sngi ban wan bad ki khlem ioh trei shuh naduh kata hi”, la kynnoh ka Kong Kharshiing.
Ka la ong ba haduh mynta, kim shym la ioh ia ka jingsiew ia kaba la dep trei ha u snem 2012-2013. Kawei na kine ba shah pynduh bai nong ka dei ka kong Trilian Umsong kaba la trei 51 sngi ha u bnai Lber bad Iaiong 2012 bad ha u Nailur 2012. Ka Kong Kharshiing ka la ong ba kane ka longkmie ka la ioh pdiang  ia ka bai nong tang  12 sngi na ka 51 sngi.
Haba ki kwah ban peit katkum ka ain wad jingtip Right to Information (RTI) ban peit ia ki kyrteng ba la thoh ia ka jingwan trei jongki da ka VEC hynrei ki khlem shah bad khlem ailad satia. U number muster roll jongka, u dei 141644, 141645, 141648,  141650 kaba kdew ia ka jingtrei jong u bnai Lber haduh Iaiong 2012 la pynjah bad ia ki tarik la pyndam bad ia ka tarik jong u bnai Jylliew 2012 la pynmih kaba pyni ba ka la don ka jingleh buit tuh, la ong ka CSWO.
Watla ki la  pan jingtip da ka RTI, bad u BDO ka Pynursla u PS Tynsong u la leit jngoh ia ka shnong ha ka 10 tarik  Nailur 2013, uba la kular ia ki ban pynioh ia ka jingsiew hynrei kaba lyngngoh ka long haduh mynta ki khlem pat ioh satia.
Nalor ka Kong Kong Trilian, la don ruh kiwei kiba iakynduh kum kane ka jingeh kiba khlem ioh bai nong ia kaba ki la dep trei jong u snem 2012-2013, hynrei la shu phah soi ha ka muster roll ia ki jingtrei thymmai kiba khlem leit trei hadien ba ki la khlem ioh jingsiew.  
                Katkum ka ain jong ka MNREGA kawei ka longing kan ioh bylla shi spah sngi ha ka shi snem bad ki lah ban pynbiang ia kane ka sngi da kaba trei lang bun ngut ruh kampher. Hynrei ki don ki longing ba trei bun phew sngi hynrei ki ioh bai bylla tang khyndiat sngi.
                Ki nongkyndong bym nang thoh nang pule, ki leit trei ban ioh ia ka pisa ban pynbiang ia ki jingdonkam jongki hynrei lada ka long ha kane ka rukom, kane ka skhim kaba ki ong kaba jop ka long tang ha ka ktien, la ong ka CSWO.
                Ka CSWO ka la ong ba ka la don ka jingoyndonkam bakla ia kane ka skhim ha kaba a la don lai ngut na kajuh ka longing kiba don 3 tylli ka Job card jong ka MNREGS ha shnong Pynter hi ba kynthup ia u Kania Khongmawloh, ka lok jongu ka Tlidamai Nongrum bad u khun jongu Eliphiles Nongrum ki la leit bylla ban shna ia ka lynti iaid kjat ha shnong naduh ka 28 tarik Risaw 2013 haduh 3 tarik Naiwieng 2013 bad u code number 2102008011/RC/913 jong u 2013-2014.  Ki don ruh kiwei ki code kiba khlem kdew hynrei kine lai ngut na kajuh ka longing ki ioh la kajong ka Job Card bad ki la ioh trei palat ia ka 100 sngi haduh 162 sngi jong u snem 2012-2013, katba kiwei kim ioh tang 100 sngi ruh, la ongka CSWO.
                Une u Elphilis Nongrum u dei Secretary ka VEC bad ruh u Secretary ka shnong Pynter.
                Ka CSWO ka la dawa na ka bor ba dei peit ban shim khia wut wut ia kane ka jingpyndonkam bakla ia ka bor katkum ka ain khnang ba ka jingshim kabu na ka jinglong biej ki briew kan sangeh shi syndon ha kane ka shnong bad sha kiwei ki shnong. Ka  CSWO ka dawa ruh ba ka ain ka dei ban trei tyngeh ia ki nongtrei sorkar kiba kyntait ban iarap ia ki nongkyndong ban pyndep ia ka kam kumba la bynshet ia ki kumba la kdew ha ka ain ka MNREGAS.