Shillong:Ka Executive Director ka State Disaster Management Authority ka kong Matsiewdor War, mynhynnin ka sngi ka la pyntip ba uwei u briew u la iap bad 3 tylli ki mrad ha ka jingjulor na ka bor jong ka mariang na duh ka 8 haduh 16 tarik Jylliew haduh mynta. Bad ka jing shah ktah ki long 79 ki shnong, 186 tylli ki ïing bad 2777 ngut ki briew.
Ka la iathuh ba la ioh slap 354.09 mm naduh 1 tarik Jylliew haduh mynta.
Katkum ka Indian Meteorological Department (IMD), baroh ki district la peitngor bha ia ka jinglong jingman ka mariang bad ha kine ki lai sngi la pynlong ia ka jingmaham ia ki paidbah bad la pynmih kyrpang ka jingmaham ha ka 15 bad 16 tarik ia ki lai tylli ki district kynthup ka East Khasi, West Khasi bad Jaintia Hills.
Lyngba ka Common Alerting Protocol (CAP) haba ioh ia ka jingmaham na ka IMD, la pyntreikam ia kane ka CAP bad la phah ia ki message sha ki paidbah lyngba ki mobile kiban shah ktah ha ka jingmaham na ka bor ka mariang.
La phah ruh ia ka jingmaham lyngba ka Sachet App, bad haduh mynta la phah ia kine ki jingmaham lyngba ki kompeni Jio, Airtel, BSNL, Vodafone bad kiwei ki kompeni mobile. Ha kine ki ar sngi ba la dep, la phah 8.9 lak tylli ki message ha kaba nyngkong bad ha kaba ar la phah 3.70 lak ki message sha ki mobile.
Ka Executive Director ka la kyrpad ia ki paidbah ban sei ia ka Sachet App ban poi ki jingbatai ia ka jinglong jingman ka mariang ha ki mobile jongki.
Ki don 79 tylli ki shnong kiba shah ktah ha ka bor jong ka mariang bad kumba 2777 ngut ki briew kiba shah ktah ha ka bor mariang.
Phi don ban ong eiei?