Khlad uwei ha Assam, na ka covid 19, kiew 6,500ngut ha India

Uwei u briew, uba pang Covid-19, ula iam hynnin ka sngi ha Assam bad u dei uba la don 65 snem ka rta.

U Himanta Biswa Sarma, myntri ka koit ka khiah ka sorkar Assam, u iathuh mynta ka step, ba U Faijul Haque Barbhyan (65), na Hailakandi District, ula khlad noh ha ka jingshah ha ha SMCH, na ka COVID19.

Ka jingiap ha United States, ka poi sha ka 1,783 ha ki 24 kynta ba ladep, ong ka khubor jong ka Johns Hopkins University. Ka jingiap, ka la duna khyndiat, na kaba long 1,973 shi sngi mynshwa.

Ka jingiap ha India, mynta ka la poi sha ka 199ngut bad kiba ioh pang, ki la poi sha ka 6,500ngut.

Ha ki 12 kynta ba ladep, ki don 809ngut kiba dang shu ioh pang thymmai bad kiba iap, ki long 46ngut, ong shuh ka khubor.