Khlad uba mynsawjur naba bthei ka trok kit umphniang

Jowai, 11 Nohprah:
Uwei na kiba la mynsawjur ha ka jingkem ding bad bthei ka trok kit umphniang petrol ha Mookhep ha kane ka sngi Palei ba ladep, u la khlad noh hynne shiteng synia. Utei uba la khladnoh udei uba la tip kyrteng kum u Marius Sumer uba dei shnong trai na Lapangap hynrei uba la wan shongkha ha Shnong Wapungskur.
Kumban shu pynkynmaw, ha kane ka sngi Palei bun ngut ki briew ki la mynsaw bad katto katne ki la mynsaw jur hadien ba kawei ka trok tanker kaba kit umphniang petrol ka la kylla bad kem ding haduh ba kan da bthei.
Katei ka trok kaba don ia u No. NL01G-8248 kaba dang wan na sha thain Guwahati bad kaba thmu ban leit sha Thain Silchar. U driver katei ka trok u khlem iathuh sha ki pulit halor ka jingkylla katei ka trok jong u bad u la jah rngai ruh haduh mynta.
Napdeng kiba la mynsaw jur, u dei u Marius Sumer bad utei u briew u la khlad noh hapdeng ka jingshitom jur mynhynne shiteng synia.
Ha kawei pat ka jingjia, mynta ka sngi U Blei, kawei ka trok kit umphniang disel kaba don ia u No. MN05-2070 ka la kylla ha Riat Turiem shwa ban poi Jowai haba wan na Shillong. Hadien ka jingkylla katei ka trok, ki paidbah ki la wanrah ia ki borti, bad ki tiar jingdiang ban pdiang umphniang ba hoit na katei ka trok.