Khlad u wei bad mynsaw jur ar ngut ha ka jingjia aksiden kali ha Kynshi

Nongstoiñ: U wei u briew u la duh noh ia ka jingim katba ar ngut kiwei pat kila mynsaw jur hadien ba ka Auto kaba ki shong ka la ia tyngkhuh noh bad kawei ka Jeep ha ka surok bah Nongstoiñ-Shillong kaba hap ruh hapoh ka shnong Kynshi Bangla.Katkum ka tyllong khubor ba la ioh lum la ong ba katei ka jingjia kala jia ha ka janmiet jong ka sngi Saitjain jong ka taiew ha kapor kumba 2:15 PM kaba dei ruh kapor ba dang jur bha u slap.

Shuh shuh la ong ruh ba ha katei kapor katei ka Auto Rickshaw kaba don ia u number  ML 06 2328 kaba dang wan kit Um Rupa mar iapoi ha katei ka jaka kumno re kumno, kala leit ban ia tyngkhuh noh bad ka Jeep bala niah da u Croswell Nongsiej kaba don ia u number ML 10 A 0955 ka dang mih na ki thaiñ Kynshi bad thmu ruh ban leit phai sha shnong Tyngri.

Ha katei ka Auto Rickshaw kila don haduh lai ngut kiba shnong ha kaba baroh kila mynsaw jur bad hadien bala pynkit sha Civil Hospital Mairang u nongniah katei ka Auto Rickshaw u Rison L. Nonglait 22 snem ka arta na ka shnong Kynshi Mawria u la khlad noh katba kiba la mynsaw la tip kyrteng kum u Delitestar Diengdoh bad u Dorshal Jana kiba dei na ka shnong Kynshi Mawria.