Khlad u rangbah ha shen, ba bakla siat u paralok

Shillong: Ha kawei ka jingjia kaba sngewsih kaba la jia ha ka janmiet jong ka 21 tarik u bnai Nailur 2021 ha kaba uwei u briew ia u ba la tip kyrteng kum u Bah Loadstar Thongni u ba la don 47 snem ka rta u la kum bakla siat ia u paralok lajong ia u ba la tip kyrteng kum u Bah Khrimshon Thongni u ba la 67 snem ka rta bad u ba khlad noh hashen katba ki dang pynlong ka jingap shrip ia ki mrad kiba wan ban pynjot ia ki jingthung jingtep jong ki ha ki jaka rep.

Katkum ki tyllong khubor kiba la ioh lum na ki pulit jong ka Mawkyrwat South West Khasi Hills District ki la iathuh ba ki la ioh jingtip halor katei ka jingjia ha ka por kumba 9 baje janmiet eiei ha ka 21 tarik u bnai Nailur bad ha ka step jong ka 22 tarik u bnai Nailur ki pulit ki la hiar sha ka shnong Ngunraw South West Khasi Hills District ban tohkit halor kane ka jingjia bad katkum ka jingiathuh jong ki riew rangbah katei ka shnong ki la iathuh ba ha ka 21 tarik u bnai Nailur 2021, ki la don katto katne ngut ki nongshong shnong kiba la leit ban peit ia ki mar rep jong ki ha ki jaka rep kiba don sha khlaw ba ka la don ka jingshah pynjot ha ki mrad khlaw ha ki sngi kiba la leit noh hynrei ha ka por kumba 1 baje shiteng ne 2 baje eiei janmiet katba ki dang pynlong ka jingpahara ha katei ka jaka rep da kaba ki la ia saphret ban leit la ka jong ka jong ka lynti kaba jngai uwei na uwei ban ap ia ki mrad bad mar kumta hi ka la wan mih kynsan kawei ka mrad khlaw kaba la thmu ban pynjot ia ki mar rep jong ki bad dei ha kane ka por ba u Bah Loadstar Thongni u la kum bakla ban khem ia ka suloi bad u kuli u la ksam beit ia ka met jong u Bah Khrimshon Thongni u ba la khlad noh hashen ha katei ka jaka kaba ki khot ka Ranggor domba kaba jngai kumba 2 ne 3 kynta eiei napoh ka shnong Ngunraw.

Na ka liang ki bor pulit ki la kem noh ia u nongsiat bad ki la rejistar case halor kane bad ia ka suloi ruh la dep ban kurup noh. Ia ka met jong u Bah Khrimshon Thongni la dep ban leh post mortem bad la aiti noh sha ki bahaing hasem jong u ba kin leh ia ka niam ka rukom khadduh.