Khlad u Rangbah ba shah tied ha ki paidbhur

Nongpoh: Uwei u Rangbah uba la tip kum u Bah Mangkara Khymdeit, uba trei kum u Musteroll ha ka PWD, na ka shnong Mawkyrdep ha Ri Bhoi, u la khlad noh hynne ka sngi ha PHC Kyrdem, hadien ba u la mynsaw jur na ka jingshah bom shah tied jem ha ki paidbhur hynnin ka miet ha shnong Klew.
La ioh jingtip ba ia ka met jong utei u Rangbah, la lap hynne ka sngi da ki briew na ka shnong Mawkyrdep lem bad ki Pulit, kiba la lap ia u na kawei ka Khlaw kaba don ha Klew, ha kaba u la thiah lyngkhuid khlem jain ha ryngkat ka jingmynsaw kaba jur.
Haba pyrshang ban wad jingtip ia ka daw kaba la pynlong ia utei u Rangbah ba un shah bom haduh ba un da khlad syndon, la ioh ia ka jingtip kaba malu mala, ba ka daw hi ka dei ba ki paidbah ki la kynnoh ia u ba u dei u Nongshohnoh.
La ioh ruh ban iakren bad u Rangbah shnong ka Klew, u Bah B. Sten, ha kaba u la iathuh ba ma u, u la ioh jingtip ha ka por 10 baje ei ei mynmiet, namar u Rangbah dong jong katei ka shnong u la pyntip sha u ba ki la iohbat ia uwei u briew, na kawei ka jaka kaba kham dum. Kumta halor katei kum u rangbah shnong, nga la kyntu ia ki ba kim dei ban ktah kti ei ei, hynrei ki dei ban wanrah ia u sha iing Durbar, na ka bynta ban kylli ia ki jingshisha bad lada donkam sa aiti pat sha ki briew ka Ain.
“Sa khyndiat por pat, la don biang kiba la pyntip shanga, kiba la pyntip ba utei u Rangbah, u la laitphet na kti jong ki bad u la phet sha Khlaw” ong utei u Rangbah shnong.
“Imat naduh katei hi ka por, ba ki pyntip shanga ba u la lait phet, utei u Rangbah u la shah shoh bad tied jem ia utei u Rangbah, tad hadun ba un da mynsaw jur bad kaba la pynlong ruh ia u ba un duh syndon ia la ka jingim” bynrap utei u Rangbah shnong.
Haba iadei bad katei ka jingjia, na ka liang ki Pulit ka Ri Bhoi, ki la ki iathuh ba u Hymmen jong utei u Rangbah uba la shah bom ha ki paidbah, u la dep ban buh da ka Ejahar halor katei ka jingshah bom iap u para jong u.
Halor katei ka jingjia, na ka liang ki Pulit kin dang pynlong ia ka jingtohkit kaba jur, na ka bynta ban lap ia ki jingshisha baroh.