Nongstoiñ: U wei u rangbah uba la tip kyrteng kum u Jostarfield Nongsiej 27 snem ka arta na ka shnong Mawlieh u la duh ei noh iala ka jong ka jingim hadien ba u la shah iuh ha kawei ka trok rit (pickup) rong lieh kaba ym shym pat la lah ban tip ia u registration number.
Katkum ka tyllong khubor bala ioh lum la ong ba katei ka jingjia kala jia hynnin ka janmiet jong ka sngi Palei hajan ka madan Ramphar hapoh ka shnong Mawthungmarwei jong ka thaiñ Rambrai West Khasi Hills District, ha kapor kumba 5:00 PM ei ei.
Shuh shuh ka tyllong khubor ba la ioh lum ka iathuh ruh ba ha katei ka sngi kala don ruh ka jingialehkai phutbol ha katei ka madan bad hadien bala wai katei ka jingialehkai la jia katei ka jingjia bad la ong ruh ba ha katei kapor ba u tei u rangbah u la shah iuh u la don ha pdeng jong ka jingmynsaw kaba jur bha bad la pynkit noh ruh ia u mar mar shapoh Civil Hospital Nongstoiñ, hynrei namar ka jingjur palat ka jingmynsaw u tei u rangbah u la khlad noh ha shiteng lynti.
Na ka liang jong u nongniah ia katei ka trok rit hadien katei ka jingjia u la phet krad noh na katei ka jaka khlem pat wan mih satia kumta na ka liang jong kiba ha iing jong u tei u rangbah u bala khlad kila leit ban ujor ruh da ka ehajar hapoh Nongstoiñ Police Station.
Hadien bala ioh ban pdiang ia ka jingujor ki pulit kila register ia ka case katkum ka case number 74(10)18 U/S 279/304A IPC bad ka jingtohkit halor katei ka jingjia ka dang iaid shakhmat.