Khlad U Pastor Marbaniang, dang 49 snem

Shillong, 10 Iaiong:
U Pastor K.R Mar baniang, uba shong basah ha Baniun, Upper Shil long u la khlad noh mynta ka sngi ka 10 tarik u iaiong, 2015 ha Robert Hospital, hadien ka jing pang kaba la ban jur ia u, kaba la neh kumba katto katne por. U Pastor Mar baniang u dang don ha ka rta kaba 49 tam, la kha ia u ha ka 1 tarik u jylliew, 1966 bad la ordain Pastor ia u ha u snem 1994 ha Ladthaboh, Jowai.
Ka jingleit on tep ia u kan long ha ka lah sng u Blei, ka 13 tarik u iaiong, 2015 ha u lum jingtep ka balang Presbyterian Baniun, bad ia ka jinglehniam leh rukom shuwa ban leit buh ia ka metiap jong utei u Pastor yn pyniaid da u Pastor H.F Wahlang, uba dei u Moderator jong ka Synod.
U la shakri kum u Pastor ha ka balang Presbyterian la 21 tam mynta. Ha ka jingshakri jong u kum u Pastor ka Balang Presbyterian , u Pastor Marbaniang u dei peit ia ka District Kynshi kaba hap hapoh ka Presbyteri Mairang haduh ki sngi ka jingkhlad noh jong u. U la long ruh u Pastor uba peit ia ka Ribaibal naduh u snem 2006 bad u la bat kum u nongpeit ia ka Ribaibal ka KJP Synod Sepngi , u la long teng ruh u moderator jong ka Mairang Presbytery.
Halor ka jingkhlad u Pastor Marbaniang, haba ia kren bad u Rupang uwei na ki pastor Rangbah ka balang Presbyterian u Pastor D.S Sohkhlet u la ong ba ka jingkhlad noh u pastor Marbaniang ka dei ka jingduh nong kaba khraw ia ka balang baroh kawei bad khamtam eh ia ka Synod, “U dei u pastor uba dang don ka jingkyrmen ban shakri ia ka balang ha ki snem ki ban dang wan, u dei ruh u pastor uba lah ban long u nongialam ha ka Synod , ha ka balang , hynrei ngi la duhnong ia u” ong u pastor Sohkhlet haba ia kren bad u Rupang.
Haba pynkynmaw shuh ia ki kam jong u pastor Marbaniang, u pastor Sohkhlet u la ong ba tang hapoh ka rta kaba san phew snem u Pastor Marbaniang u la trei bun ki kam ha ka jingshakri ia ka balang bad ia ka synod, “U dei u shakri uba aiti ha ka kam” ong biang u Pastor Sohkhlet.