Khlad u parad uba 108 snem ka rta

Nongpoh:U Parad (L) Shelis Mohon Roy Rajee, uba dei ruh u nongshong shnong hapoh ka shnong Lum Nongthymmai Byrnihat, u la khlad noh mynta ka step ha ka por 7 baje ei ei mynstep hapoh ka iiing lajong kaba don ha katei ka shnong, kata ha ka rta kaba 108 snem.

U Parad (L) Shelis Mohon Roy Rajee, u dei u lok jong I Meirad (L) Aiberis Chyne bad katkum ka jingiathuh ki briew, la ong ba la u dei uwei na ki riew rangbah ha ki por kiba mynshwa, bad uba la long ruh kum u Secretary ka Byrnihat Pyllun bad uba dei ruh uwei na ki rangbah, uba la noh synniang ia shibun ki kam babha ha ka thain Byrnihat hi baroh kawei.

  Haba iadei bad ka jingkhlad u Parad (L) Shelis Mohon Roy Rajee, na ka liang Bah Sosthenes Sohtun, MLA ka Jirang, u la ai ka jingiaroh halor ki kam babha jong utei u Parad, namar u dei u briew uba la iarap ym tang ia ka thain Byrnihat, hynrei dei ruh uba la nohsynniang ha kiba bun ki kam babha.
  Namarkata, u MLA ka Jirang, u la phah ruh ia ka khubor sngewlem sha ka longiing jong utei U Parad (L) Shelis Mohon Roy Rajee.