Khlad u nongring khubor U PCN, mynsaw jur u nongshon dur

Shillong, 11 Risaw:
U bah Kenny Warjri u nongring khubor jong u PCN u la khlad noh hadien ka jingjia aksiden kaba shyrkhei kaba la jia mynta ka sngi katba ma u bad uwei pat u nongshon dur khubor u bah W. Lytan ki dang don ha lynti ban leit sha Garo Hills na ka bynta ban leit shim khubor kaba ia dei bad ka elekshon MDC ka GHA DC ka ban long lashai ka sngi ka 12 tarik u risaw. Kitei ar ngut ki shong da ka kali Ertiga , u nong niah katei ka kali ruh u don hapdeng ka jingmyn saw kaba jur.
Katei ka jingjia aksiden ka la jia ha ka por 2:15 baje nohphai sngi katba ki dang poi ha surok bah National highway 51 hajan Paikan kaba don ha Goalpara District ka jylla Assam. U bah Kenny, 28 snem karta u la shong hadien katba u bah Lytan, 49 snem karta pat u shong hakhmat mar syndah u nongniah , hynrei haba la poi ha katei ka jaka ka kali jong ki ka la kum tynrah ia uwei u diengbah bad ka la thung khongpong ha surok.
Ki doktor ka Seven Sisters Hospital and Research Centre, Goalpara, ki la pynbna ba u bah Kenny Warjri u la khlad noh ha ka por baje nohphai sngi namar ba la jur palat ka jingmynsaw katba ia u bah WLytan pat la pynkit noh mar mar na katei ka jaka sha Guwahati Medical College Hospital (GMCH) bad mynta u don hapdeng ka jingshitom kaba jur.
Ka MEPA ka la pynpaw ia ka jingsngewlem jong ka halor ka jingkhlad kyndit u bah Kenny Warjri , Camerama u PCN uba la khlad noh ha ka jingjia aksiden kaba la jia mynta ka sngi ha Assam katba u dang don ha ka lynti ban leit sha Garo Hills na ka bynta ban leit ring khubor ia ka jingthep vote elekshon GHADC ka ban long lashai ka sngi. Kum u nongring dur khubor u dei u briew uba nohsynniang shibun ha ki kam ai khubor sha ki paidbah bad u dei uba la ieit bad burom da baroh. Ka MEPA ka la phah ia ka khubor sngewlem sha ki bahaing hasem bad ka duwai ba u blei un don ryngkat bad ki ha kum kane ka por ba wan jia ka jingjia kaba sngewsih kthang bad ka la kitbok ruh ba uwei pat u nongshon dur khubor u bah W.Lytan uba dang don hapdeng ka jingshah sumar namar katei ka jingjia aksiden ba un ioh noh ia ka met kaba koit ba khiah. Kane ka long katkum ka khubor ba la pyllait paidbah da u President ka MEPA u bah R.M Shabong.