Khlad u nongniah, mynsaw jur u nongbud, ha ka jingjia aksiden hajan Pahamrioh

Nongpoh: Ha kawei ka jingjia aksiden kaba la jia hynnin ka miet ha surokbah NH-6 hajan ka shnong Pahamrioh, Ri Bhoi, u nongniah jong kawei ka trok kit Gas (Tanker), u la khlad noh bad u nongbud jong katei ka trok, u la mynsaw jur bad uba dang don mynta hapdeng ka jingsumar.

Katei ka jingjia aksiden ka la jia hynnin ka miet ha ka por 10:30 baje eiei mynmiet, ha kaba la ong ba katei ka trok kit Gas ba thylli, kaba don ia u number AS-04-4201, ka dei kaba mih na Silchar da ka jingthmu ban leit sha Guwahati, hynrei haba la poi ha katei ka jaka, ka la tynrah nadien jong kawei ka kali kaba ym don ba tip bad kaba la pynlong ia katei ka trok kit Gas ba kan da julor shaba palat eh.

Haba la jia katei ka jingjia aksiden, ki briew kiba la lap ia katei ka jingjia, ki la pyrshang ban ai jingiarap ia u nongniah bad nongbud jong katei ka trok kit Gas, kiba la pynkit ruh mar mar ïa ki sha Nongpoh Civil Hospital, hynrei tang hadien katto katne por ba la poi ha jaka sumar, u nongniah jong katei ka trok, uba la tip kum u Achik Barbuyia, u la khlad noh na sla pyrthei, katba u nongbud uba la tip kum u Sunil Nath, u dang don hapdeng ka jingshah sumar.